Një 32-vjeçar shqiptar ka rënë pre e dhunës dhe torturave çnjerëzore të dy shtetasve italianë dhe gjithçka ka ndodhur për prishje pazari në shitjen e një motoçiklete. Ngjarja e rëndë ka ndodhur ditën e dielë në ishullin e Rodosit dhe sipas mediave greke, 32-vjeçari shqiptarë është mbajtur i lidhur nga një italian 40-vjeçar dhe nipi i tij 29 vjeç.
Të dielën, shqiptari kishte marrë vesh se “miku” i tij italian kishte mbërritur nga Athina në Rodos, ndaj e ftoi në dyqanin e tij që të sqaronin një mosmarrëveshje. Siç përshkruan shqiptari për policinë, ata e lidhën në një karrige elektrike dhe e goditën me thika dhe e kërcënonim me sëpatë. Mosmarrëveshja mes palëve kishte lindur pas shitjes së një motoçiklete nga shqiptari tek 40-vjeçari italian, që banonte në Athinë. Ky i fundit ka ndërruar mendje dhe i ka kërkuar 32-vjeçarit shqiptar kthimin e parave që kishte shpenzuar për blerjen e motoçikletës dhe riparimin e tij. Nga dëshmia e shtetasit shqiptar, dhënë për policinë greke, thuhet se bëhej fjalë për një shumë prej 250 eurosh, që sipas viktimës, autori e kërkonte me ngulm pasi i duheshin para për të paguar disa doza kokainë.
