Një korrier narkotikësh është arrestuar në orët e fundit në aksin Gjirokastër-Kakavijë, bëjnë të ditur burime policore lokale. Sipas burimeve, në pranga ka rënë shtetasi Blerim Harrunaj, 26 vjeç, i cili është kapur në posedim të 7 kilogramëve lëndë narkotike të llojit kanabis. Ndalimi i 26-vjeçarit është bërë në kufirin jeshil, në Piramidën numër 28. Ai po e transportonte drogën në një çantë të zezë, të ndarë në 7 pako të mbështjella me natriban. Burimet shtojnë më tej se, uniformat blu janë vënë në kërkim të dy bashkëpunëtorëve të Harrunajt, ndërsa i kanë kaluar materialet prokurorisë.
