Në shkollat greke studiojnë 69 mijë e 880 femijë të emigrantëve shqiptarë
Shpëtim Zinxhiria, Koorenspondent i “Telegraf” në Athinë
Ditën e premte më 18 nëntor pritet të dalin para gjykatës
në Athinë dy shoferë Altin Tafa dhe Agim Asllani të Ministrisë së Jashtme të
Shqipërisë, të cilët u arrestuan më 14 nëntor në qytetin e Janinës, pasi
transportonin libra shqip. Ata u ndaluan nga policia greke me akuzën për
transportim të materialeve propagandistike dhe për cënim të marrëdhënieve mes
dy vendeve. Por, në gjendje të lirë pas katër ditësh ata janë thirrur për
paraqitje pranë gjykatës së Athinës me akuzën e shpërndarjes së librave shqip.
Mësohet, se njeri prej shoferëve ishte pajisur me pasaportë diplomatike ndërsa
tjetri ishte hera e parë që hynte në Greqi. Theksohet, se materialet po
transportoheshin prej dy të ndaluarve nuk ishin të vulosura dhe rrjedhimisht
nuk konsideroheshin pako diplomatike, por as nuk kishin asnjë dokument shoqërues
të Ministrisë së Jashtme shqiptare, ndaj, sipas palës greke, konsiderohet
kundërvajtje.
Çudia më e madhe
Çudia më e madhe është, se e njëjta mënyrë transporti po
bëhet për 20 vjet resht dhe sot, pikërisht, konsiderohet transport i paligjshëm
dhe materiale propagandistike dhe cënim marrëdhëniesh midis dy vendeve. E
gjithë kjo zhurmë, bëhet në një kohë që siç dihet në shumë shkolla greke
zhvillohet në mënyrë të ligjshme mësimi i gjuhës shqipe. Por mbi të gjitha kjo dukuri
nuk duhet anashkaluar, në një kohë që shteti shqiptar në këtë drejtim ka bërë
pak ose aspak. Nuk kemi parë një
marrëveshje të mirëfilltë nga shteti shqiptar për hapjen e shkollave shqipe në
Greqi si shkolla dygjuhëshe, aq sa modeli i shkollave interkulturale dygjuhëshe
në Greqi është vetëm një teori e suksesshme. Ndalimi i dy shoferëve nuk është
rastësi, ashtu si nuk është rasti transporti i librave të gjuhës shqipe gjatë
20 viteve të fundit. Burime nga PMJ në Shqipëri bëjnë bëjnë me dije, se dy shoferët,
nëse do të gjykohen nuk do të jenë të pranishëm gjatë seancës të gjyqit në
Athinë.
Fati i
librave?
Një problem mbetet edhe fati i 1500 librave dhe abetareve në një kohë që i
lanë të hyjnë në doganën në Kakavijë dhe i ndalojnë pas disa kilometrash, në
Janinë. Burimet zyrtare pranë MPJ bëjnë fjalë se ato ende ndodhen në ambientet
e policisë greke. Fakti është se asgjë nuk bëhet në mënyrë ilegale, madje
përveç ambienteve në shkolla është pushteti vendor grek që ka mirëpritur këtë
iniciativë të shqiptarëve prej shumë vitesh siç është ai i të mësuarit të
gjuhës shqipe në Greqi. Shumica e këtyre klasave, të
ashtuquajtur shkolla interkulturale janë hapur
me iniciativa të disa shoqatave të ndryshme në Greqi, në një kohë që mësimi
bëhet falas, gjithashtu edhe mësuesit janë vullnetarë….
Shkollat shqipe nuk janë të paligjshme në Greqi
E
theksojmë me të madhe se duhet të rikujtojmë qeverisë
aktuale të Greqisë, faktin se, ka qenë vetë ish ministrja e arsimit e qeverisë së
Karamanlis, Marieta Jianaku, që e ka propozuar këtë lloj mënyrë, duke u bazuar
në eksperiencën që ka shteti grek me shkollat greke në Diasporë. Ministrja Marieta Janaku ka theksuar
gjatë një takimi me përfaqësues të shoqatave shqiptare se, ne mund t’ju japim që
të shfrytëzoni godinat e shkollave çdo fundjavë, por kur u pyet për problemin e
librave dhe pagesës të mësuesve ajo u shpreh se, ky është problem që duhet ta
zgjidhej nga shteti juaj dhe jo ne! Shkolla të tilla ka në Athinë, në disa zona
të Atikis si Markopulo, Virona, Salamina, në Volos, në Selanik, në Mitilini
etj. Ekzistojnë mbi 18 shkolla të tilla. Por
çfarë ndryshoi papritur?
Nëse ky veprim
do të kishte ndodhur në Greqi, do të përbënte një incident
Nëse ky veprim do të ishte bërë nga autoritetet shqiptare,
ku të prangoste ndonjë shofer që do sillte tekste te gjuhës greke për
minoritarët, qeveria helene padyshim do të kishte reaguar si gjithnjë, do të
përbënte një incident politik që do cënonte marrëdhëniet midis dy vendeve.
Shqipëria me tone të ulura është munduar ta trajtojë këtë rast ashtu siç i ka
hije një vendi që tenton të integrohet në BE, duke mos u pajtuar me veprimin
fundit të vendit fqinj, i cili jo vetëm është anëtar i BE për më shumë se 35
vitesh, por është vendi ku lindi dija, arti, kultura dhe mbi të gjitha
Demokracia.
Studimet
që frikësojnë helenët!
Vetëm në vitin 2004 shqiptarët zotëronin 63.2% te lejeve të
banimit në Greqi, kurse në shkollat greke studionin 69 mijë e 880 fëmijë të
emigrantëve shqiptarë, ose 72.4% e numrit të përgjithshëm të të gjithë
emigrantëve të huaj. Shumë studime greke janë bërë mbi gjendjen edukimit e
emigranteve, por duke iu referuar studimit me temë “Edukimi dhe Praktika Interkulturale
në Greqi, të Dr. Nektario Paleologou në vitin 2000, hedh dritë mbi rritjen 400%
të numrit të studenteve me kombësi shqiptare (1995-2000) ndërsa në një studim
të tij tre vite më pas (2003) studentet me kombësi shqiptare në Greqi përbënin
80% të të gjithë numrit të të huajve. Dr. Nektariu nënvizon, se shoqëria greke
nuk është e përgatitur të pranojë popullatën e re të fëmijëve të emigrantëve,
pa shtuar këtu fëmijët e emigrantëve që lindin në Greqi.
