“Universum Donna” vlerëson Irma Kurtin me një çmim prestigjioz që e marrin 10 gratë më të dalluara në fusha të ndryshme
Në Shqipëri ka lënë poezinë e saj të mrekullueshme dhe emrin e nderuar në fushën e letrave shqip. Ndërsa në Zvicër është nderuar me një çmim, të cilin e ka merituar, me punën e saj të jashtëzakonshme. Ky çmim u jepet çdo vit nga “Universum Academy” në bashkëpunim me Universitetin e Paqes në Lugano të Zvicrës dhjetë grave, të cilat janë dalluar në fusha të ndryshme të shoqërisë. Në ceremoninë e dhënies së çmimeve që do të organizohet në prezencën e personaliteteve të botës së kulturës, shoqërisë civile dhe vullnetariatit ndërkombëtar, fitueseve do t’u jepet dhe emërtimi “Ambasadore e Paqes” i Universitetit të Paqes së Zvicrës Italiane. Manifestimi organizohet nga Universum Academy me president profesor Valerio Ruberto dhe ka mbështetjen e Parlamentit Evropian për Sigurimin dhe Paqen, Dhomës Europiane të Tregtisë e organizmave të tjera kombëtare e ndërkombëtare. Në ceremoni e dhënies së çmimit do të ftohen gjithashtu përfaqësues të institucioneve diplomatike e konsullatave, kryetarë të bashkive, drejtues rajonale etj. të qyteteve apo vendeve prej nga vijnë fitueset. Irma Kurti me një karrierë të gjatë letrare si autore e shumë teksteve të këngëve në Festivale ne RTSH, numëron nëntë libra në shqip, në poezi, prozë e publicistikë dhe tre në italisht. Është vlerësuar me çmime të shumta nëpër konkurse ndërkombëtare letrare në Itali e Zvicër si: çmimi i parë në Konkursin Napoli Cultural Classic 2011 në seksionin e autorëve të huaj, çmimin e parë në Konkursin “Lago Gerundo” 2011, çmim special në Konkursin “Coluçio Salutati” 2011, çmimin e dytë në Konkursin Ndërkombëtar “Giovanni Gronchi” 2012, çmimin e tretë në Konkursin Ndërkombëtar “Europa 2013” në Lugano, etj. Poezitë e tregimet e saj bëjnë pjesë në shumë antologji si në ato të Librarisë Ndërkombëtare të poezisë në Maryland të USA; “Il Federiciano” publikim i “Aletti Editore“, “Diffusione Autori” 2011, “Raçonti delle donne straniere 2012/2013” etj.