Dëgjoni, dëgjoni,
Nga deti shikoni
Si ç’fryn e tërbohet,
Sa vjen e zgjerohet,
Në qiell, në re,
Kaluar mbi dhe,
Të zeza si nata,
Shtrëngata.
Nga zalli po ngrihet,
Si mal e përzihet,
Me breshër, me shi,
Një pluhur i zi,
Në fshat e qytet,
Përhapet rrëmuja,
Dhe kuja.
Kush pyet për djalin,
Për lopën, a kalin,
Një plakë qyqare,
Kërkon një manare,
Një nuse shikon,
Mos duket përgjon,
Në detin e larg,
Një barkë.
Po qielli dhe deti,
Të dy si tërmeti
Dhe shpesët i ndjek
Dhe barkat përpjek
Dhe pemët rrëzon
Dhe arat shkreton
Shtrëngata.