Në harkun e 72 orëve të fundit, tri tritolvënie, asnjë i ndaluar
Ngjarjet e ditëve të fundit të ndodhura në Durrës, kanë krijuar tmerr e panik tek qytetarët, dhe pasigurinë për jetën e tyre. Brenda 72 orëve në Durrës kanë ndodhur tre ngjarje të tmerrshme, ku janë hedhur në erë me eksploziv tre automjete, duke krijuar një klimë terrori psikologjik e fizik. Ngjarja më e fundit ishte ajo e ndodhur mëngjesin e të hënës, në automjetin e drejtorit të Burgut të Fushë-Krujës Arben Sulos, kur ky i fundit ishte duke lëvizur në rrugën e portit. Policia pas këtij akti kriminal u mjaftua vetëm me një njoftim të thatë për mediet “Makinës së drejtorit të burgut në Fushë-Krujë, Arben Sulo i është vendosur eksploziv, ngjarja ka ndodhur rreth orës 08.25 të ditës së hënë brenda portit të Durrësit, ku mjeti i drejtorit të burgjeve ishte në lëvizje teksa ka shpërthyer. Nuk dihen ende rrethanat, ndërsa strukturat tona po hetojnë për zbardhjen e plotë të ngjarjes”. Arben Sulo ka mbetur i plagosur rëndë dhe ndodhet në ambientet e spitalit të Durrësit. Ai ka punuar edhe më parë në strukturat policore të Drejtorisë Policisë Durrës, dhe njihet si njeri korrekt në detyrë. Ngjarja e rëndë e ndodhur ndaj tij, padyshim ka lidhje me detyrën që ai mban si drejtor i burgut të Fushë-Krujës. Ngjarjet e ditëve të fundit në Durrës, shpërthimet me eksploziv, duke pasur si objektiv persona të veçantë, e kanë rikthyer në këtë qytet frikën dhe panikun e banorëve. Duket se edhe arrestimi i katër personave duke u kapur atyre në cilësinë e provës material një sasi të konsiderueshme eksplozivi të montuar në celularë gati për shitje e veprim kriminal, nuk e ka larguar frikën e qytetarëve. Ata shprehen se “jemi të tmerruar, po shpërthejnë makinat me eksploziv në mes të qytetit, në mes të plazhit, në qendra të banuara, kurse policia si gjithmonë vjen dhe rrethon vendin e krimit, fëmijët tanë po flenë me ëndrra bashkë me ne”. Neglizhenca dhe paaftësia e uniformave blu, ulja e forcës goditëse dhe zbuluese, apo edhe më keq akoma bashkëpunimi me element të veçantë të botës kriminale, e kanë zbehur punën dhe propagandën për “polici të qytetarëve”. Në Durrës si asnjëherë tjetër, krimi po godet në qendër të qytetit, në mes të ditës, në mes të objekteve të rëndësisë së veçantë siç është porti për të treguar “dhëmbët” e tij, për të treguar sfidën e fituar me policinë, dhe futur panik në popull. Situata më e fundit, kur në çdo 24 orë në Durrës ka pasur një automjet të hedhur në erë me eksploziv , duke regjistruar edhe persona të plagosur dhe të lënduar, tregon rritjen e forcës goditëse të krimit, dhe paaftësinë apo edhe më tek edhe panikun e policisë. Por ata që e vuajnë me pasoja traumalogjike këtë situatë terrori janë qytetarët e thjeshtë. Ata shprehen se “kemi nisur të kontrollojmë qysh herët në mëngjes makinat sapo dalim nga shtëpia, pasi mund të na ndodhë ndonjë hata ne dhe fëmijëve tanë që shkojnë në shkolla, kjo situatë është për të vënë ulurimën, shteti duhet të shkundet dhe jo të bëjë propagandë arritjesh”. Ngjarja ndaj drejtorit të burgut të Fushë-Krujës
Ngjarja e rëndë (dhe e radhës me eksploziv) ndaj Arben Sulos drejtorit të burgut të Fushë-Krujës, ka ndodhur rreth orës 08.25 në mëngjesin e të hënës, kur ai ishte nisur si zakonisht, duke dalë nga rruga përmes Portit –Detar, për tu futur në autostradë drejt Vorës me makinën e tip tip opel me targa AA 654 AS. Por sapo kishte kaluar posbllokun tek Drejtoria e APD dhe ishte duke kaluar me shpejtësi normale drejt daljes tek Ura e Dajlanit, makina e Arben Sulos ka shpërthyer , duke u përplasur me kangjellat e rrethimit të portit. Vetë ai ka mbetur i plagosur dhe po i nënshtrohet ndërhyrjeve mjekësore. Dy prej forcave të Sigurisë Portuale që e kishin parë ngjarjen, pasi ishin në shërbim, thanë se “ishte e tmerrshme, makina ka lëvizur sikur e shtynte dikush me dorë, shpërthimi ishte i fuqishëm, u tmerruam, ishte e papritur, shkuam menjëherë dhe ndihmuam të plagosurin”. Arben Sulo i është nënshtruar ndërhyrjeve mjekësore dhe ndodhet jashtë rrezikut për jetën, ndërsa policia po punon dhe shpreson të zbulojë shkaqet dhe autorët e këtij krimi makabre. Ai mban postin e drejtorit të burgut të Fushë-Krujës prej 1 viti, dhe policia dyshon tek ndonjë konflikt i mundshëm për shkak të detyrës. .
Artur AJAZI
