Shoqata për Integrim i Pensionistëve të Shqipërisë, kundër ngritjes së tarifave të shërbimit urban
Shoqata për Integrim i Pensionistëve të Shqipërisë është kundër ngritjes së tarifave të shërbimit urban. Shoqata është kundër dhe marrëveshjes mes sindikatës dhe qeverisë, pasi detyra e sindikatës është mbrojtja e të drejtave të punonjësve që përfaqëson dhe jo të bëhet palë më punëdhënësin apo me qeverinë. Kjo është e shprehur dhe në Ligjin për Shoqërinë Civile. Sindikata dhe shoqëritë e transportit urban kanë shkelur marrëveshjet e deritanishme në lidhje me shërbimin e transportit qytetar, pasi në marrëveshjen e nënshkruar për këtë qëllim, flitet për një shërbim komod dhe të kulturuar, gjë e cila nuk është kryer deri tani. Por përkundrazi, po të kemi parasysh aksidentin e fundit të ndodhur te Bërryli me shërbimin e Unazës, këto shoqëri transporti arrijnë deri në rrezikimin e jetës së qytetarëve shqiptarë. Pretendimi i fundit i tyre është se me rritjen e çmimit do të rritet dhe cilësia e shërbimit, detyrë të cilën e kanë patur për ta kryer. Përse nuk është kryer deri tani?
Nisur nga deklarimi i vetë Kryeministrit Edi Rama, se rritja e akcizës së karburanteve me 10 lekë/litër nuk do të ndikojë në ekonominë e shtetasve shqiptarë, vërejmë me keqardhje se pas vendimit të rritjes së akcizës, erdhi dhe marrëveshja e fshehtë për rritjen e biletës dhe aboneve të transportit urban (nga 30 në 70 lekë është propozimi i shoqërive të transportit urban), deri në vendosjen e një çmimi unifikues nga qeveria. Ne, si shoqatë, nuk duam ta besojmë se Kryeministri do të miratojë një vendim të tillë, duke mohuar kështu dhe deklaratat e tij me biznesin, kompanitë e ndryshme dhe qytetarët shqiptarë.
Rritja e çmimit të biletave është e papërballueshme, duke marrë parasysh nevojat e domosdoshme të moshës së tretë dhe mundësitë që ata kanë sot për sot, kur aktualisht ne e dimë që masa e pensionit është minimale dhe e papërballueshme për nivelin e jetesës, pasi kjo shtresë sot jeton në varfëri ekstreme. Për vetë vështirësitë që kjo shtresë ka kaluar për 45 vjet nga puna fizike, sot mosha e tretë vuan nga disa sëmundje kronike dhe është e detyruar të udhëtojë me linjën urbane për vizita të specializuara, analiza, shërbime të ndryshme shëndetësore etj. Dhe për çdo dit,ë kësaj pjese me rritjen e çmimit të propozuar nga kompanitë e transportit urban, mesatarisht i takon të paguajë 280 lekë (për dy shërbime urbane), p.sh. një të moshuari nga Kamza paguan linjën që vjen në Tiranë plus linjën deri te qendrat mjekësore vajtje-ardhje, 4 herë 70, bëjnë 280 lekë, por mund të ketë të moshuar të cilëve u duhet të marrin tre shërbime urbane.
Abuzimet e shoqërive të transportit
Ne mendojmë se rritja e çmimit të urbanëve nuk është e saktë, sepse shoqëritë e transportit në të gjitha linjat nuk përdor kondicionerin, për të kursyer naftën. Problem tjetër është mosdhënia e biletave nga faturinot, të ardhurat e të cilave shkojnë në dobi të shoqërisë së transportit, por abuzohet me taksat fiskale.
Çmendet tregu
Përveç rritjes së biletës, duke qenë se tregu është i pakontrolluar nga shteti, kemi rritje të menjëhershme të çmimeve të produkteve të përdorimit të përditshëm.
Produkti Ishte Është
Domatja 70 lekë 110 lekë
Trangulli 80 lekë 120 lekë
Sallata 50 lekë 120 lekë
Qepa e njomë 50 lekë 50 lekë
Qepa e thatë 40 lekë 70 lekë
Lakër e bardhë 80 lekë 100 lekë
Lulelakër 75 lekë 100 lekë
Vezë 12 lekë 15 lekë
Sheqer 90 lekë 130 lekë
Vaj 280 lekë 320 lekë
Makarona (1 kg) 120 lekë 180 lekë
Patate 40 lekë 60 lekë
Mishi 750 lekë 850 lekë
Tregu vepron me rritje të menjëhershme të çmimeve të produkteve të konsumit të përditshëm, edhe pse mishi rrallë futet në konsumin e pensionistëve, nën maskën e rritjes së akcizës për hidrokarburet. Kjo është fatura, me të cilën duhet të përballen çdo ditë pensionistët, por dhe e gjithë shoqëria shqiptare. Shoqata për Integrimin e Pensionistëve të Shqipërisë ngre zërin kundër rritjeve drastike të çmimeve duke kërkuar nga qeveria që të mbajë premtimin e dhënë nga vetë Kryeministri, duke futur në kontroll dhe tregun e çmendur të kësaj kohe. Veçanërisht, mosha e tretë do të besojë se vetë Kryeministri nuk do të bëhet palë e këtyre mashtrimeve të matrapazëve që kërkojnë të pasurohen brenda ditës, në dëm të moshës së tretë dhe të gjithë qytetarëve shqiptarë.