INTERVISTA/Nasip Naço, Nënkryetari i Kuvendit: “Në p/buxhetin e 2013-s mungojnë investimet për infrastrukturën e Beratit”
Projektbuxheti i 2013-s do të fillojë të diskutohet dhe të votohet në Parlament, mirëpo deputeti i Qarkut të Berati dhe Nënkryetari i Kuvendit, zoti Nasip Naço në intervistën për “Telegraf” deklaron se, nuk do ta votojë nen për nen këtë p/buxhet të 2013-s, pasi në të mungojnë fondet për përmirësimin e infrastrukturës së qarkut të Beratit, duke e diskriminuar për mungesën e plotë të rrugëve. Zoti Naço, pohon se, është i vendosur për mosvotimin e p/buxhetit, edhe sikur kjo t’i kushtojë mandatin e deputetit për thyerje të disiplinës partiake, por njëkohësisht, zoti Naço u bën thirrje edhe deputetëve të PD-së që zgjidhen në qarkun e Beratit, të zhvishen nga kostumi partiak dhe të bëjnë gjithçka që qarkut të Beratit t’i jepen fonde në p/buxhet për përmirësimin e infrastrukturës.
“ U bëj thirrrje deputetëve Pollo, Maliqi dhe Xheka, që të dalin nga kostumet partiake dhe të kontribuojnë për investime në Qarkun e Beratit, për të mbajtur premtimet që i kanë dhënë elektoratit të Qarkut të Beratit”
-Zoti Naço, deri tani LSI-ja nuk është shprehur për dekretimin e Kryeprokurorit, Llalla. Ju do ta votoni këtë kandidaturë në Kuvend?
– Sigurisht, unë do ta votoj kandidaturën e zotit Llalla si Kryeprokuror. E kam njohur nga afër zotin Llall, kur kemi bashkëpunuar dhe vlerësoj integritetin e tij profesional dhe kam bindjen se është kandidatura më e përshtatshme, pasi është një nga më të mirët si prokuror. Edhe si kryetar i ILDKP-së, zoti Llalla ka treguar integritet moral dhe profesional dhe është mbi palët politike, i pandikuar në zbatimin e detyrës së tij.
– A është marrë vendim nga LSI-ja si do të sillet në votimin e kandidaturës së Llalës në Kuvend?
– Nuk kemi vendosur politikisht në grupin parlamentar të LSI-së, pasi ne nuk marrim vendime politike për dekretet e Presidentit në emërimin e drejtuesve të institucioneve të pavarura. Unë, ju thashë, si deputet, do të votoj kandidaturën e Kryeprokurorit të ri zotit Llalla, pasi e vlerësoj për integritetin moral dhe profesional.
– Këto ditë në komisionet parlamentare është diskutuar edhe p/buxheti i vitit 2013-të, ku PD dhe PS e kanë bërë publike qëndrimet e tyre, ndërsa LSI-ja edhe për p/buxhetin nuk i është referuar. Ju, do ta votoni, si LSI?
– Unë do ta votoj në parim, por jo nen për nen.
– Domethënë, ju flisni për votën tuaj dhe nuk detyroheni nga një vendim politik i LSI-së?
– Unë do të votoj p/buxhetin në parim, pasi nuk dua të kundërshtoj rritjen e pagave dhe të pensioneve, investimet në shkolla. Por nuk do të votoj p/buxhetin nen për nen, kur bëhet fjala për infrastrukturën për qarkun e Beratit. Unë para një muaji kam kërkuar interpelancë me ministrin e Transporteve dhe të Financës për të shtuar investimet në infrastrukturën e qarkut të Beratit dhe konkretisht për të përmirësuar akset e rrugëve nacionale që lidhin qarkun e Beratit me qarqet përreth, por deri tani nuk është bërë asgjë. Dhe, për pasojë, gjendja e infrastrukturës është në gjendje të mjerueshme dhe kjo diskriminon edhe qarkun e Beratit. Kam parë që në p/buxhetin e 2013-s nuk ka asnjë fond për të përmirësuar infrastrukturën e rrugëve nacionale që lidhin Beratin me qytetet e tjera dhe, nisur nga kjo, nuk kam të drejtën morale, qytetare dhe politike, që të votoj nen për nen p/buxhetin e 2013-s. Në gjithë Shqipërinë, në 7 vjetët e kësaj maxhorance, u investuan në 8.000 km rrugë, ndërsa në qarkun e Beratit nuk janë investuar as për 100 km në infrastrukturë. Me votën time kundër këtij p/buxheti të 2013-s, kërkoj nga qeveria që t’i jepet prioritet edhe përmirësimit të infrastrukturës të qarkut të Beratit.
– Gjithashtu, në p/buxhetin e 2013-s, karakteristikë është se në qarqet, ku PD-ja nuk ka fituar, mungojnë, në përgjithësi, investimet. Edhe qarku i Beratit, a nuk është i diskriminuar për mungesë investimesh?
– Unë ju përmenda një aspekt për mungesën e investimeve në infrastrukturën e Beratit. Atje përditë ndeshesh me braktisjen dhe shikojeni edhe duke parë që ka rënën ndjeshëm edhe numri i vizitorëve të huaj, që për shkak të rrugëve të këqija, nuk vijnë më në Berat. Prandaj, unë nuk e votoj, nen për nen p/buxhetin e 2013-s. Ky projektbuxhet nuk i është përgjigjur nevojave dhe kërkesave të popullit të qarkut të Beratit.
– Ka ndonjë mundësi që të reflektohet në përmirësimin e këtij p/buxheti, në shtimin e fondeve për infrastrukturën e Beratit?
– Unë prandaj e votoj në parim dhe shprehem se nuk do ta votoj nen për nen, në qoftë se nuk ka reflektime. Ka kohë që qeveria të reagojë për të mirë.
– Ju, si deputet, nuk do ta votoni p/buxhetin e 2013-s, edhe pse jeni pjesë e maxhorancës, por doja të thosha përse vetëm ju jeni kaq i impenjuar, derisa deputetët e tjerë të PD-së të Qarkut të Beratit, nuk reagojnë?
– Unë shpreh atë ndjenjë përgjegjësie që ndjej përpara popullit të qarkut të Beratit, që më besoi votën, për edhe për ata që nuk më votuan. Unë u ngarkova nga populli i Beratit që të shpreh dhe mbroj interesat e tyre. Duke përfituar nga kjo intervistë, u bëj thirrje deputetëve të PD-së, zotit Pollo, zotit Xheka, zotit Maliqi, që të zhveshin kostumin e tyre partiak dhe të mbrojnë interesat e elektoratit të qarkut të Beratit, që u ka mirëbesuar votën dhe të bashkohemi të gjithë, që qeveria të shtojë në buxhetin e 2013-s fondet e domosdoshme për investimin e përmirësimit të infrastrukturës të qarkut të Beratit. Deputetët të reflektojnë tani, që nesër, në fushatën zgjedhore të kenë të drejtë morale dhe politike që të ballafaqohen me elektoratin e qarkut të Beratit.
– Zoti Naço, duke qenë se ju do të votoni p/buxhetin e 2013-s, duke dashur të mbroni interesat e elektoratit të Qarkut të Beratit dhe jo të marrëveshjes PD-LSI, mos vallë kjo do t’ju kushtojë politikisht?
– Nuk më intereson kostoja politike partiake, edhe duke e lënë mandatin e deputetit, po qe se kërkohet interesi partiak mbi interesin e elektoratit tim në qarkun e Beratit. Kur unë shikoj që diskriminohet politikisht qarku i Beratit me mosinvestime në infrastrukturë, duke e lënë akoma qarkun e Beratit me ato rrugë të mjerueshme, nuk më intereson t’i bindem vendimeve politike. Duhet t’ju kujtoj që prioriteti i bashkëpunimit LSI me PD ishte që t’u jepnim prioritet edhe investimeve në qarkun e Beratit. Unë u kam premtuar elektoratit të qarkut të Beratit se do të bëj gjithçka për të ndihmuar në investime dhe vota ime është arma demokratike që me ka besuar populli i Qarkut të Beratit, për të mbrojtur interesat e tyre.
– Faleminderit!
