Kuvendi miratoi dje projektligjin për pensionet e minatorëve. Ministri i Mirëqenies Sociale dhe Rinisë, z. Erion Veliaj, deklaroi se projektligji për minatorët jo vetëm që ul moshën e daljes në pension me 5 vjet, por nga ana tjetër rrit përfitimet e të gjithë atyre ish minatorëve, të cilët deri më tani kanë përfituar trajtim të veçantë financiar. “Ish minatorët që sot përfitojnë 9,000 lekë trajtim të veçantë financiar do të shohin një rritje të madhe të të ardhurave të tyre, pasi falë këtij ligji, rreth 75 % e tyre do të përfitojnë pension në masën 14,474 lekë në muaj. Pjesa tjetër, si edhe ata minatorë që do të dalin me këtë ligj në pension, do të përfitojnë pensione mujore akoma edhe më të larta, deri në masën 21,000 lekë në muaj”, u shpreh ministri Veliaj gjatë prezantimit të projektligjit në Kuvend. Duke iu përgjigjur pretendimeve të opozitës se me projektligjin në fjalë përfitojnë vetëm 150 individë, z. Veliaj publikoi listën e 3840 minatorëve që preken nga ligji, të cilëve iu ulet mosha e daljes në pension, si dhe iu rriten përfitimet. “Nga 3840 individë, 3700 përfitojnë menjëherë, pasi kanë qenë pjesë e një ligji, gjithashtu të majtë, për trajtim të veçantë financiar”, sqaroi z. Veliaj. Nga ana tjetër, ministri Veliaj tha se sipas diskutimeve të bëra në Këshillin Kombëtar të Punës, përfaqësues të industrisë minerare dhe sindikatave kanë rënë dakord për të rritur kontributin në masën 5 % të pagës nga të cilat 3 % do të paguhen nga punëdhënësi dhe 2% nga punëmarrësi. Gazeta “Telegraf” boton të plotë listën me 3740 emra të minatorëve përfitues, pasi “100 të tjerë janë në proces e sipër”, njofton Ministria e Mirëqenies Sociale.
Lista e qyteteve me 3840 minatorët që përfitojnë ulje të moshës së daljes në pension dhe dyfishimin e pensionit:
Durrës 163
Dibër 5
Bulqizë 391
Mat 103
Elbasan 14
Librazhd 200
Fier 13
Lushnje 6
Gjirokastër 8
Memaliaj 179
Korçë 226
Pogradec 368
Devoll 11
Ersekë 43
Kukës 263
Has 15
Lezhë 35
Kurbin 34
Mirditë 100
Shkodër 37
Pukë 69
Tiranë1448
Kavajë 6
Vlorë 80
Sarandë 23
http://www.gazetatelegraf.com/wp-content/uploads/2014/11/lista-e-minatoreve.pdf