DUAR TË BUTA RESH
Duar të buta e të bardha resh
Ledhatojnë shpinën e lodhur
Të malit të Dajtit,
E mua m’ u kujtuan duart e tua
Të largëta e të bukura
Mbi trupin tim.
O zot!
Mos na lerë kurrë
Pa duar drite e resh!
XHEPAT E SHPIRTIT
Fus duart nëpër xhepat e shpirtit
Dhe nxjerr prej andej,
Vetëm fjalë malli e dashurie.
Kisha vite që t’i kisha thënë
Dhe era e kohës
Ish munduar t’i flakte
Prej buzëve sa më larg
Në honin e pamëshirë,
Ku s’arrija t’i dëgjoja më.
Harrova se ka një vend
Ku ruhen përjetë.
Ndaj nisa t’i përkëdhel
Xhepat e shpirtit.
SHI DASHURIE
Një erë e lehtë
Me shi dashurie
Fryn mbi gjethet e pemës
Së shpirtit tim,
E degët zgjaten si duar
Të kapin siluetën tënde
Prej drite
Tretur nëpër ajër,
E unë, shushurij i tëri
Me zëra zogjsh.