Në 80- vjetorin e lindjes
Ish nxënësi i Normales së Elbasanit, luftëtar i çështjes kombëtare sot në 80 vjetorin e lindjes, numëron mbi 15 vepra për çështjen kshqiptare
Data 15 Mars 2014, shënoi 80 vjetorin Profesor Doktor Zekiria Cana figurë dinjitoze në Panteonin e Kulturës Shqiptare, ndarë nga jeta katër vite më parë. Për figura të tilla themi në ngjallje se me veprën e punen e tyre mbetën të gjallë e në jetë si udhërrëfyes dhe edukator të Idealit Kombëtar. Zekiria Cana është konsideruar si një nga korifenjtë e historianëve për Kosovën e Shqipërinë dhe e ka vendin e nderit me meritë në Panteonin e Kulturës Shqiptare. Si lis i madh ka bërë hije të freskët jo vetëm për një fis në Gjakovë e Kosovë, për mbarë popullin e Kombin Shqiptar… Para veprës e kujtimit të kësaj figure përulemi me respekt duke kujtuar mësimet e vlerësimet që i ka bërë historisë së popullit shqiptar me porosinë e madhe: “Mos harroni kurrë se jeni Shqiptar. Duajeni me shpirt e zemër Lirinë e Pavarësinë e Kombit Shqiptar! ”. U lind në Gjakovë më 15 Mars 1934. U arsimua aty deri me Normalen për mësues e pastaj në Universitetin e Beogradit në fakultetin e historisë e filozofisë. Që mësues në Deçan e Irzniq filloi të shkruaj e bashkëpunoj me shtypin e kohës si “Përpjekja”, “Rilindja”, “Përparimi”, “Gjurmime Albanologjike”, “Flaka” etj. U nda nga jeta me 11 Janar 2010 pas një pune e aktiviteti të shumanshëm shkencor e atdhetar. Veprimtaria shkencore e Profesor Canës është e gjerë dhe e shumanshme për kulturën kombëtare. Punoi mbi 40 vjet në Institutin Albanologjik duke u bërë shembull për objektivitet në studimin e historisë së popullit shqiptar si vlerë kombëtare e ndërkombëtare, duke u bërë edhe mësues e udhëheqës shkencor për punonjësit e rinj shkencorë. Që nga 1962, veç punës në Institut e Arkivin Shtetëror të Prishtinës, i është kushtuar me themel studimit të “Lëvizjes Kombëtare Shqiptare në Kosovë” më 1909-1912 dhe qëndrimin serb ndaj saj, me të cilën me 1975 mbrojti tezën e magjistraturës . E në vitin 1984 mbrojti disertacionin “Socialdemokracia serbe dhe çështja shqiptare 1903- 1914” duke u bërë shembull për një punë cilësore e me vlerë shkencore. Hodhi poshtë manipulimet e historiografisë serbe. Në bibliografinë e tij numërohen mbi 15 vepra të veçanta dhe qindra artikuj referate e kumtesa shkencore të mbajtura ne Kosovë, Shqipëri, Shkup- Tetovë, Ulqin- Plavë, në gjithë hapësirën shqiptare e disa vende në Europë e Amerikë mirëpritur e respektuar mediatikisht. Profesor Cana fatin e vet e lidhi me fatin e popullit brenda e jashtë kufijve. Studimet e tija janë konsultuar me masën e studjuesve e të lexuesve e studimet e tija kanë qenë dhe mbeten udhërrëfyese për gjykim e veprim në realizimin e idealit kombëtar. Me këtë theksojmë se në këto 60 vjet të punës së tija për çështjen kombëtare provojnë e duhet vlerësuar se në themelet e Kosovës se pavarur është dukshëm edhe kontributi i këtij burri të madh e të ditur. Që në fillimet e jetës djaloshare e studentore ai e ndjen peshën e rënd të pushtimit kolonial sllavo- serb e asnjëherë nuk e uli kokën. Është nga të parët intelektual që ngriti zërin kundër dhuës titiste. Vlerësoj drejt luftën ilegale me atë të drejt përdrejtë duke hedhur tej përpjekjet për “pafajësi” në gjyqet e kohës që shvlerësonin objektin dhe paraqitjen trimërore të heronjve të kohës. Ai deklaron me guxim: “Po, Adem Demaçi është kundër regjimit jugosllav të Tito- Rankoviçit e për të drejtën e bashkimit të Kosmetit më Shqipërinë…kjo me plebishit ose me luftë…”. Në përkrahje të këtyre deklarimeve ai pati pasojat e përndjekjes, izolimit e të pushimit nga puna në periudha të ndryshme se njohu veprën heroike të Mandelës së Kosovës Adem Demaçi e Ukshin Hoti dhe admiroi përjetë Ibrahim Rugovën, Adem Jasharin, Hashim Thaçin, Arbër Xhaferin, Ali Ahmetin e tjerë. Me guxim e trimëri Profesor Cana demaskoi vrasjet kriminale të ushtarëve shqiptar në Armatën Jugusllave, e varrimet madhështore të këtyre bijëve të kosovës, me fjalimet e Profesorit u kthyen në një manifestim të fuqishëm të tubimeve të mëdha me një organizim të vetëdijshëm të Kosovës për qëndresë e rezistence kundër regjimit serbo-sllav, efektet e së cilës nuk do të vononin të shfaqeshin në organizimin e luftës se UÇK-së në vitet ’90. Mbledhjet popullore për pajtimin e gjakmarrjes në Kosovë, organizuar nga studentët e menaxhuar me mjeshtëri e trimëri nga Anton Çeça e Zekiria Cana me shokë, kanë pergatitur popullin e Kosovës për dasmën e madhe të Lirisë. Janë historike tubimet dhjetëramijëshe pjesmarrës në Kuvendet e Pajtimit Gjaqeve te Verrat e Llukës, Gjanaj, Lezhan, Likoshan, Çirez e Prekas e shtërgimi i duarve mes familjarëve, janë kontributi i jashtëzakonshëm i unifikimit e qëndrimit për unitetin kombëtar që dha Profesor Cana, fjala e të cilit ushqej besë, nder, urtësi e bashkë me Anton Çetën zgjuan ndërgjegjen kombëtare për Kosovën e Lirë Demokratike. “Kosovës i nevojitet – thoshte Profesori – bashkimi në një besë, në një fjalë, në një flamur, në një front e në një sofër të bashkimit mbarëkombëtar”. Më këtë moto u ngrohën zemrat për pajtim e u ndezën zemrat për luftim… Më ka takuar që të njihem herët me këtë Profesor atdhetar jo vetëm në Kukës, Lumë- Has- Tropojë që para viteve ’90, po më vonë edhe në Prizëren, Gjakovë e Prishtinë, e si studiues kemi përfituar mjaftë në biseda e takime si dhe nga veprat e tija shkencore e kulturore të pranishme në bibliotekat tona. Me këtë zonë të Kukësit me lidhje historike e vllazërore, pati një interesim të veçantë dhe dha ndihmë konkrete për studimin e qëndresës luftarake, veçanërisht në vitet 1908-1913, si të kryengritjeve anti-osmane, të Betejës së Lumës me 1912 si dhe për pasojat e masakrimit të pashembullt që ushtria serbe bëri në këto anë, me 1913. Ndryshe nga shkencëtarët teoricien të historisë, Profesor Cana u mor më mirë se kushdo tjetër me aktualitetin historik të Kosovës. Për këtë, pa u futur në analizën e gjithë veprave të tija, shikoni veprat “Shpalime historike- 83, 98”, “Ditari i Luftës -99” ,“Ditari i Robërisë 1 e 2 Prishtine 1999” apo “Apeli i 215 i intelektualeve shqiptare 2001”. Në “Ditari i Robërisë 1 e 2 për periudhën 10 vjeçare (1989-1998) do të gjeni vlerësime me një tematikë të zgjeruar si p.sh. “Kur vritet Besa”, “Ramiz Alisë i kërkon lirimin e të burgosurve politik”, “Për Berishën: 4 vërejtje themelore për qartësi… dhe je President i Kombit, ska Shqipëri pa Kosovën”, “Lokalpatriotizmi rrezik intelektual në Shqipëri e Kosovë”, “Gegëzimi i gjuhës letrare hap hendekun Veri-Jug, Tosk- Gegë”, “Takim me Ibrahim Rugovën”, “8 ditët e përmbysjes së madhe në Shqipëri 7 mars 1997” apo “Shteti pa ushtri”, “Shkatërrim e rremujë ”, “Radio Kukësit i vihet dryni”, “Drenica në luftë”, “një komb një qëndrim”, “Ç’bënë Bukoshi?”,”Bisedë me Jakup Krasniqin”, “Riçard Hollbruk në Junik”, “në Malishevë i pritet fjala Zekir Canës, e saboton LDK për deputetët”, Emisioni “Krushqit e pajtimit në TVSh”, “Vrasja e Azem Hajdarit në errësirë”, “Sofra është më e fortë se pushka”, “Protestë në Rambuje etj” e vazhdon me UÇK, NATO e qëndrimin e ndërkombëtarëve. Vend qendror zënë edhe ngjarjet në Shqipëri, takimet e tij me Mejdanin, Majkon, Berishën, Goden etj. Në flakën e luftës së UÇK-së Profesor Cana gjedet bashkë me popullin kryengritës në front e i bie pash më pash Kosovës e Shqipërisë si kalorësi i vërtetë i lirisë. Jetën , veprën, motivimin atdhetar të tija do ta dëshironte gjithkush. Ai ishte dhe mbetet një autoritet absolut në fushën e historiografisë përkrah figurave të shquara të kësaj fushe në Kosovë si Ali Hadrit, Rexhep Qosjes, Pajazit Nushit, Mark Krasniqit, Zef mirditës, Xheladin Shalës, Jusuf Bajraktarit, Sali Bashatës e tjerë. Me shembullin e tij ai na mëson sesi të bëhemi të dobishëm për atdheun, shoqërinë dhe familjen. Ai çmon shumë brezin e ri, vitalitetin dhe energjitë e tija e, tek arsimimi e shkolla, shikonte shëndoshjen e kombit. Të thuash për të se qe njeri i ditur, është pak pa u njohur me veprën e tija si shkencëtar dhe njeri i mendimit dhe veprimit atdhetar në vite, pa njohur stilin e fuqishëm të komunikimit mjeshtëror të bisedës me moshat e ndryshme. Veprat, përkthimet e temat shkencore të tija pasurojnë fondin e historiografisë shqiptare në përgjithësi e të asaj kosovare në veçanti. Meriton vlerësim emri i këtij qiriri të pashuar të kulturës shqiptare.
*Studjues, “Mësues i Merituar”
