Mos ma kujto
E shkuara ka çaste dhe orë të hidhura, mos ma kujto
për shembull, më pe me duar të lidhura, mos ma kujto!
Për shembull më pe në rrugë të pirë, mos ma kujto,
Të pirë e të humbur, të sharë e të grirë, mos ma kujto!
Për shembull më rrahën dy-tre vagabondë, mos ma kujto,
Tek shihja një grerëz tek rrinte mbi gonxhe, mos ma kujto!
Për shembull pësova diku një disfatë, mos ma kujto,
Dhe gjumi s’më zinte me ditë e me natë, mos ma kujto!
Për shembull më pe duke ecur e qarë, mos ma kujto,
Mbështetur pas murit me zemër të vrarë, mos ma kujto!
Për shembull më pe duke ngrënë e gënjyer, mos ma kujto,
Të prishur, të shthurur, të rënë e të thyer, mos ma kujto!
Për shembull në shtrat s’u bëra për burrë, mos ma kujto,
I turpshëm i drodha si qengj nën lëkurë, mos ma kujto!
E shkuara ka orë dhe çaste të hidhura, mos ma kujto,
Ka ndrojtje dhe heshtje kur lipsen të thirrura, mos ma kujto!
HESHTJA
Cigarja u dogj gjer në fund
Mbi tryezë gjumi më mori
Në xham era perdet i tund
Dhe hesht korridori.
Me kokë në tryezë të flesh
Të shohësh ëndrra të blerta
Sa ndot!…Të zgjohesh e prapë të gjesh
Në qoshe të vjellat e lëna nga jeta.
Sirena e lumit
Ajo u vërtit lakuriq
Si pata e bardhë në lumë;
Këndonte hutini në vidh,
Bretkosa fërkohej me shkumë.
Më humbi nga sytë pastaj,
Siç humbin sirenat e lumit,
Më mbetën veç hiret e saj,
Dhe nazet e kurmit.
U zhvesha dhe lumit me not
I rashë tri herë;
Ju them se notoja aq kot,
Sa dukesha fare i mjerë.
Madje, dhe bretkosa u lig,
Sa s`donte aspak të më shihte,
Në vend të hutinit në vidh
Veç hëna fytyrën e griste.
Kur dashuroheshim
Kur dashuroheshim në kohën tonë,
Kur tretesha dhe digjesha për ty,
Nga njëri-tjetri letrat vinin vonë,
Kalonte dhe një muaj apo dy.
Po ndofta dashuria mbahej gjallë,
Se zjarrin mbanin letrat në udhëtim
Me biçikletë a mushkë apo me kalë
Në vapë e shi, dëborë dhe thëllim.
Kur dashuroheshim në kohën tonë
Me zor na vinin letrat fshat-qytet
Nuk kishim nëpër dhomë telefonë
Dhe në ëndërr s’kishte faks dhe internet.
Megjithatë më mirë që nuk kishte
As telefon, as internet, as faks,
Se fjalë e nisur shpejt dhe mund ta vriste
Një dashuri të vjetër për një çast.
Në vendin tim!
Në vendin tim dhe në vendin tënd
e çpojnë lakrën, i hedhin mend.
Në vendin tim dhe në vendin tënd
Njërit i kruhet, tjetrit i dhemb.
Në vendin tim dhe në vendin tënd
Hënën si petull e pjekin në shkëmb.
Në vendin tim dhe në vendin tënd
Një kokë e çmendur, … një vend e çmend!
DHE SIKUR
Dhe sikur në botë ti mos ishe,
Do jetoja si çdo gjë që jeton,
Veç pa ty kjo botë do lëvizte
Siç lëviz pa ngrohje një vagon.
S’ma zëvendëson ti botën mua,
S’të zëvendëson as bota ty,
Por sa botën sigurisht të dua,
Kur jetojmë e vdesim tok të dy.
