Kush vjen në
Itali për pak ditë nuk ka nevojë të kërkojë vizë në konsullatën italiane. Kjo
është e vërtetë, por është po aq e vërtetë që liberalizimi i vizave që gëzojnë
shqiptarët parashikon që kush lëviz në Evropë duhet të respektojë disa kushte
(si për shembull, të mos qëndrojë më gjatë se 90 ditë në gjashtë muaj në zonën
Schengen) e të ketë me vete dokumentacion të nevojshëm për të treguar, për
shembull, motivin e qëndrimit, që mund të mbajë veten nga ana ekonomike ato
ditë që ndodhet në udhëtim, që ka ku të qëndrojë, që do të kthehet në atdhe. Veçanërisht
në aeroportet e portet e Italisë, jo gjithnjë janë kërkuar këto dokumente, por
edhe për shkak të rritjes së kontrolleve kundër terrorizmit e kundër
emigracionit klandestin, policia e kufirit po tregohet e rreptë. Më në hollësi,
në çdo pikë kufitare të Italisë, kanë të drejtën të kërkojnë veç pasaportës
biometrike edhe:
Biletën e kthimit;
Sigurimin shëndetësor (që të mbulojë udhëtimin dhe
periudhën e qëndrimit);
Shumë të mjaftueshme parash për qëndrimin në Itali;
Kur deklaron se
udhëton për vizitë tek një i afërm, shtetas apo rezident në Itali, duhet
paraqitur deklarata e mikpritjes (dichiarazione di ospitalità) të personit që
jeton këtu bashkë me fotokopjen e dokumentit të tij të identitetit. Kur deklaron
në kufi se po udhëton për turizëm, për pushime, i pavarur nga pritja apo
shoqërimi i një personi tjetër, duhet të paraqitet një rezervim hoteli. Kur
deklaron se udhëton për aktivitete të ndryshme, paraqitet dokumentacioni mbi
aktivitetin, për të cilin personi është ftuar. Kur deklaron se udhëton për
arsye shëndetësore, paraqitet konfirmimi i institucionit shëndetësor ku do
shkohet apo rekomandimi nga institucioni shëndetësor shqiptar (rastet e
kryerjes së analizave etj.). Nëse udhëton drejt zonës Shengen me automjet duhet
të pajisesh me patentë ndërkombëtare drejtimi dhe me kartonin jeshil të
sigurimit ndërkombëtar të makinave.