Studentët paraqiten pranë sekretarive për të bërë regjistrimin në disa raste
Aplikimi për herë të parë i regjistrimit on-line po krijon një amulli tek fituesit e shpallur nga Ministria e Arsimit dhe Shkencës për në universitetet publike në mbarë vendin. Ashtu siç ishte thënë edhe më parë këtë vit do të ketë ndryshime për regjistrimin e fituesve për në universitete. Regjistrimi për të ndjekur studimet e larta për në universitete do të zhvillohet on-line dhe të rinjtë do të kenë pesë ditë afat duke filluar nga data 18 shtator -23 shtator. Por ndërkohë që, janë lënë dy alternativa dhe kjo krijon më shumë lodhje dhe mundim edhe për studentët. Alternativa e parë është regjistrimi on-line që do të bëhet sipas udhëzimit që është dhënë, ndërsa nëse nuk bëhet alternativa e parë, atëherë do të futet në “lojë” alternativa e dytë që është regjistrimi i studentëve pranë sekretarive të Fakulteteve. Për alternativën e dytë është shprehur qartë ministria në udhëzimin e nxjerrë pak ditë më parë ku thuhet më saktësisht se: “a) Kur kandidati nuk arrin të realizojë regjistrimin on-line, ai duhet të paraqitet pranë sekretarisë mësimore të fakultetit, ku është shpallur fitues, nga data 18 shtator 2012 deri në datë 23 shtator 2012, nga ora 08:00, deri në orën 18:00. Sekretaria mësimore kryen regjistrimin on-line të kandidatit. Në këtë rast, kandidati duhet të paraqesë një dokument identifikimi (kartë identiteti ose pasaportë). Në dosjen e sekretarisë mësimore mbahet fotokopja e dokumentit të identifikimit. Regjistrimi on-line i studentit nga sekretaria mësimore e fakultetit, kryhet sipas procedurave të parashikuara në Shtojcën nr. 2, bashkëlidhur këtij udhëzimi”. Por sipas burimeve konfidenciale të dhëna për “Telegraf” regjistrimet që do të bëhen në sekretaritë e fakulteteve më pas do t’i kalojnë ministrisë dhe kjo e fundit do të bëjë më pas regjistrimin e tyre on-line.
Pengesat dhe përparësitë
Por nuk dihet përse është bërë regjistrimi on-line në momentin që janë të papërgatitura strukturat përkatëse në momentin që nuk janë kushtet reale për ta realizuar atë? Duhet të dimë që realiteti nuk është i njëjtë dhe nuk janë të tëra zonat njësoj të zhvilluara në Shqipëri. Për këtë arsye, jo të tërë fituesit kanë akses në internet për të bërë regjistrimin on-line. Atëherë duhet të aplikohej vetëm një standard për të bërë regjistrimin, ose të bëhej i tëri on-line dhe të mos kishte vështirësi ose të bëhej i tërë njëherë në sekretaritë e universiteteve. Nga vëzhgimi që ka bërë ditën e djeshme “Telegraf” ka vërejtur që ka pasur që ditën e parë studentë që janë paraqitur në sekretaritë mësimore për të bërë regjistrimet, pasi nuk kanë mundur që të bëjnë regjistrimin on-line.
Regjistrim i dyfishtë
Ndërkohë që, edhe ajo pjesë e studentëve që do të arrijnë që të regjistrohen on-line duhet të kalojnë sërish peripeci për të mbajtur radhë nëpër sekretaritë e fakulteteve. Por eliminimi i mbajtjes së radhës nëpër sekretaritë e fakulteteve sërish nuk mund të eliminohet pasi në momentin që studentët janë regjistruar qoftë on-line ose jo duhet të paraqesin dokumentet e tyre pranë këtyre sekretarive pas mbylljes së fazës së regjistrimit. Një gjë e tillë thuhet edhe në udhëzimin e nxjerrë nga ministria për regjistrimin më konkretisht thuhet se: “Sekretaritë mësimore të fakulteteve nga datat 08- 13 Tetor 2012, gjatë orarit 08:00, deri në orën 18:00, të pranojnë dokumentacionin plotësues për të gjithë kandidatët fitues. Kandidatët dorëzojnë personalisht dokumentacionin plotësues të mëposhtëm:
a) Dokument identifikimi (kartë identiteti ose pasaportë). Në dosje mbahet vetëm fotokopja e një prej dokumenteve;
b) 2 fotografi ;
c) Mandat arkëtimi i tarifës së regjistrimit prej 1.600 lekë, paguar pranë zyrave të Postës Shqiptare, për llogari të IAL-it publik përkatës. Gjatë kryerjes së procedurës së dorëzimit të dokumentacionit plotësues, sekretaritë mësimore të fakulteteve mbajnë regjistër të veçantë me të dhënat mbi datën dhe orën e dorëzimit, si dhe nënshkrimin e kandidatëve fitues dhe sekretarisë mësimore”. Në këtë udhëzim vërtetohet fakti që ju përmendëm më lart në shkrin që nuk janë eliminuar radhët e pritjes së studentëve nëpër sekretaritë e fakulteteve, por janë shtuar më shumë procedurat me futjen e regjistrimit on-line. Madje, ky lloj regjistrimi mund të quhet një regjistrim i dyfishtë që u aplikua sivjet për herë të parë dhe që më shumë i ka shtuar procedurat sesa i ka lehtësuar ato siç pretendohet në të vërtetë. Më të vërtetë thuhet shpesh që “jemi në epokën e internetit”, por jo të gjithë kanë mundësi që të kenë akses në internet, sidomos në zonat rurale.
Favoret me programet e dyta të studimit
Ndërkohë që paralelisht janë lënë edhe rregjistrimet për programe të dyta studimi. Kjo është bërë me qëllim të mbyllen të dyja fazat e rregjistrimit dhe më pas studentët që nuk u rregjistruan as në programin e parë as në programin e dytë të shkojnë në institucionet e arsimit të lartë privat. Kjo është e theksuar edhe në udhëzimin e ministrit ku thuhet se: “Pranimi i kandidatëve për një program të dytë studimi do të kryhet nga institucionet publike të arsimit të lartë sipas kritereve të përcaktuara në statutet e institucioneve dhe rregulloren e njësisë kryesore ku bëhet regjistrimi për një program të dytë studimi. IAL-të të pranojnë kërkesat për program të dytë studimi deri në datë 24 shtator 2012 dhe të dërgojnë në MASH propozimet e tyre për kuotat për program të dytë studimi, sipas programeve përkatëse të studimit, brenda datës 26 Shtator 2012”.
