Në zemër s’gjeta kurrë paqe
Në asnjë varg të poezisë
Për ty nuk shkrova dot një faqe,
Hero i madh i dashurisë!
Një laps të kuq në gishta luaj
Po portat nuk ia hap mërzisë
Kollaj s’e kam për ty të shkruaj
Se je hero i dashurisë!…
Heronjtë me mijëra numërohen,
Në çdo minutë të historisë,
Po as të thoi s’i afrohen
Heroit tim të dashurisë!…
Ai jetoi fare pa zhurmë
Ishte hero, por i pa emër
Iku e nuk na la një gjurmë
Nuk ish njeri, po ishte ëndërr!
Ndaj nuk u shfaq me shpatë në dorë
Të sillte luftën apo paqen
Se ëndërr ish, i bardhë dëborë
Se ëndrrat ndodhin, po nuk shfaqen!…
Vetëm një çast të ngriu jeta
Kur një shigjetë të ra në sisë
Po ti nuk pyet për shigjeta
Se je hero i dashurisë!…
Po sa shigjeta të kanë zënë
Ty që nga koha e rinisë,
Po shpirtin kurrë s’e ke dhënë
Se je hero i dashurisë!…
Sa plagë nga plumbat ti ke marrë
Gjersa gjithë jeta t’u bitis,
Po mendjen fare s’e ke vrarë
Se je hero i dashurisë!…
Po sa kështjella pushtuar
Larg brohorimës dhe lavdisë
Po në litar asnjë s’ke çuar
Se je hero i dashurisë!..
Sa t’u vërsulen, po s’u epe
E natë e ditë i re borisë
Kur thanë: “U fik!” si diell shkrepe
Se je hero i dashurisë..
Në sy, në buzë dhe në gjinj
I gjete emrin bukurisë
Shkele krenar mbi gjarpërinj
Se je hero i dashurisë!…
Po dashuria ka mundime
S’janë gjë mundimet e qelisë
Ti s’u tërhoqe asnjë qime
Ndaj je hero i dashurisë!…
Vetëm një gjë ty të brengosi
Për pak mallkove Perëndinë
E zeza jetë ditët i sosi
E s’ke më kohë për dashurinë!…
Do ishte fat me të vërtetë
Të bëj për ty nekrologjinë
Do hidhja veç dy fjalë në fletë
“Jetoi dhe vdiq për dashurinë!…”
S’do jetë më mes njerëzisë
Heroi ynë i dashurisë,
Po nuk e dimë, si mund ta dimë,
Ishte hero apo viktimë?!…
Finale
S’besoj asnjërin të ketë bindur
Ylberi im i fantazisë,
Se Bota ende s’e ka lindur
Heronë e madh të dashurisë!..
19.02.2009