459 emrat e pronarëve që do kompensohen nga legalizimet

AKP: Në 5 mars nis pranimi i kërkesave të  pronarëve që përfitojnë nga ndërtimet informale. Ja tarifa dhe dokumentacioni

Agjencia e Kthimit dhe Kompensimit të Pronave njofton se në datën 5 mars fillon pranimi i kërkesave për kompensim të pronarëve që preken nga ndërtimet informale, emrat e të cilëve janë miratuar me VKM Nr.869, datë 10.12.2014 dhe VKM Nr.134, datë 12.02.2015. Gazeta “Telegraf” zbardh për të interesuarit emrat e pronarëve që përfitojnë nga VKM Nr.869, datë 10.12.2014. Ndërsa, përsa i përket  VKM-së Nr.134, datë 12.02.2015 duhet të jetë ndonjë lapsus, pasi nuk ka patuar mbledhje qeverie në këtë datë.  “Në mbështetje dhe në zbatim të VKM Nr.383, datë 19.05.2010 “Për përcaktimin e procedurave të shpërndarjes së fondit të kompensimit në vlerë për pronarët e pasurive të paluajtshme, pronë private, që preken nga ndërtimet informale”, i ndryshuar, Agjencia e Kthimit dhe Kompensimit të Pronave njofton: Fillimin e procesit të pranimit të kërkesave për shpërndarjen e kësteve për kompensimin e pronarëve të pasurive të paluajtshme, pronë private, që preken nga ndërtimet informale, emrat e të cilëve janë

miratuar me VKM Nr.869, datë 10.12.2014 dhe VKM Nr.134, datë 12.02.2015 “Për shpërblimin e pronarëve mbi sipërfaqet takuese të pasurive të paluajtshme, pronë private, që preken nga ndërtimet informale”. Procesi i pranimit të kërkesave të përfituesve nga ky fond do të fillojë më datë 05.03.2015 dhe nuk do të jetë i kushtëzuar apo limituar në afat”, thuhet në njoftimin e AKKP-së. AKKP fton të gjithë subjektet e interesuara, emrat e të cilëve janë miratuar me VKM Nr.869,datë 10.12.2014 dhe VKM Nr.134, datë 12.02.2015 “Për shpërblimin e pronarëve mbi sipërfaqet takuese të pasurive të paluajtshme, pronë private, që preken nga ndërtimet informale”, të paraqiten pranë zyrave tona për dorëzimin e kërkesës për kompensim nga fondi i ALUIZNI-t.

AKKP njofton se ka ngritur grupin e punës, i cili do të kryejë pranimin dhe regjistrimin e kërkesave të subjekteve të interesuara. Të gjithë subjektet e interesuara mund të paraqiten në Agjencinë e Kthimit dhe Kompensimit të Pronave, me adresë Rruga “Muhamet Gjollesha”, Nr. 54, Tiranë, pranë Fakultetit të Inxhinierisë së Ndërtimit, çdo ditë nga e hëna në të premte, ora 09:00 – 12:00. Të dhënat e subjekteve përfitues janë të evidentuara në listën që i bashkëlidhet vendimeve të qeverisë, ku përcaktohet shpërblimi i pronarëve të pasurive të paluajtshme, pronë private, që preken nga ndërtimet informale të miratuara deri më tani.

Tarifa dhe dokumentacioni

Aplikuesit kanë detyrimin të paguajnë tarifën e shërbimit në vlerën prej 2 000 (dymijë) lekë dhe gjithashtu të hapin në emër dhe për llogari të tyre, një llogari bankare në njërën nga bankat e nivelit të dytë. Subjekti apo përfaqësuesi i tij me prokurë duhet të paraqesë pranë AKKP-së Tiranë dokumentacionin e mëposhtëm:

1. Kërkesën tip që i vihet në dispozicion nga grupi i punës pranë AKKP-së, të plotësuar sipas rubrikave;

2. Dëshminë e trashëgimisë për të gjithë trashëgimtarët e ligjshëm të subjektit përfitues,sipas radhës së trashëgimtarëve, në përputhje me përcaktimet e Kodit Civil. Për dëshmitë e trashëgimive të lëshuara nga gjykata për testamentin e bërë me akt noterial të sillet certifikatë familjare e personit për të cilin është lëshuar kjo dëshmi (në rast se subjekti përfitues ka vdekur);

3. Prokurën e posaçme, të nënshkruar nga të gjithë subjektet që përfitojnë kompensim, ku si tagër i nevojshëm të jetë edhe e drejta për të tërhequr vlerën financiare, në emër të tyre. Në rastet kur nuk është e mundur të dorëzohet prokura e posaçme, secili bashkëpronar apo një pjesë e tyre, paraqesin kërkesë individuale apo të përbashkët, për pjesën takuese në pronën që kompensohet. Në rastin e kërkesave individuale të secilit bashkëpronarë apo të një pjese të tyre, për çdo aplikim të kryer, paguhet tarifë shërbimi në vlerën 2 000 (dymijë) lekë, pavarësisht se i përket të njëjtës pasuri të paluajtshme;

4. Vërtetimin origjinal të lëshuar nga një bankë e nivelit të dytë për hapjen e llogarisë bankare dhe IBAN-in përkatës;

5. Fotokopjen e dokumentit të identifikimit;

6. Certifikatën familjare të kërkuesit/aplikuesit;

7. Mandat pagesën për shumën 2 000 (dymijë) lekë për çdo aplikim të veçantë. Subjektet përfituese, kërkesa e të cilëve nuk është pranuar për mungesë dokumentacioni gjatë procedurave të mëparshme, kanë të drejtë të riaplikojnë. Këto subjekte nuk paguajnë tarifë shërbimi,nëse provojnë pagimin e saj gjatë aplikimit të mëparshëm.

Vendimi nr.869, datë 10.12.2014

Gazeta “Telegraf” zbardh sot për të interesuarit listën e 459 pronarëve nga Tirana, Elbasani, Vlora, Korça dhe Lezha, që përfitojnë nga legalizimet, sipas vendimit të qeverisë, datë 10.12.2014. “Me propozimin e ministrit të Zhvillimit Urban dhe Turizmit, Këshilli i Ministrave vendosi: 1. Shpërblimin e pronarëve për sipërfaqet takuese të pasurive të paluajtshme, pronë private, të zëna nga ndërtimet informale në qarqet e Tiranës, të Elbasanit, të Vlorës, të Korçës dhe të Lezhës; 2. Vlera e përgjithshme e kompensimit të jetë 256 161 718.23 (dyqind e pesëdhjetë e gjashtë milionë e njëqind e gjashtëdhjetë e një mijë e shtatëqind e tetëmbëdhjetë pikë njëzet e tre) lekë dhe sipërfaqja që shpronësohet të jetë 13 738.9 (trembëdhjetë mijë e shtatëqind e tridhjetë e tetë pikë nëntë) m², sipas tabelës nr. 1, që i bashkëlidhet këtij vendimi; 3. Zyrat përkatëse vendore të regjistrimit të pasurive të paluajtshme të kryejnë ndryshimet përkatëse për këto pasuri në regjistrat e pasurive të paluajtshme” thuhet në vendimin e miratuar nga qeveria.

Tirane