Strasburgu dënon përsëri shtetin shqiptar me shumën 1.498.400 euro. Gjykatat në Shqipëri duken pak të ndryshme nga ato që imagjinojnë në vendet demokratike. Ky është një rast demonstrativ, ku vendin e detyrimeve kushtetuese dhe të gjykimit të drejtë e ka zëvendësuar “maliqi”. Vendimi i Strasburgut në nenin 8 thotë: “Më 22 tetor 2004, Gjykata Kushtetuese, në një panel të plotë, nuk gjeti asnjë shkelje të së drejtës së ankuesve për një gjykim të drejtë”. Ky është Vendimi i datës 13 mars 2015, “Rasti Siliqi etj. kundër Shqipërisë”, për një pronë me sipërfaqe 2,461.97 metër katrorë, të kthyer me vendim të KKKP-së në vitin 1994. Ky konflikt në zbatim të ligjeve të kohës, normalisht duhej të ishte zgjidhur brenda pak muajve, por ai i ka kushtuar pronarëve disa vjet. Këmbëngulja bëri që pronarët ta marrin pronën e tyre të trashëguar, por shuma e parave do të paguhet nga shoqëria shqiptare. Paratë do t’i paguajë populli, sepse i tillë është niveli i drejtësisë dhe i politikanëve të shtetit. Qeveria është në dijeni se pronarët të zhgënjyer nga pritja prej mëse dy dekadash dhe së fundmi kompensim me nga 200 metra katrore dhe pronat e tyre t’i përfitojnë ata që kanë shkelur dhe kanë manipuluar me ligjet dhe nuk kanë asnjë të drejtë trashëgimie mbi ato prona, po postojnë dosjet në Strasburg, duke e vlerësuar atë Gjykatë që u kthen fizikisht pronën. Për këtë kapitull, “Telegraf” ka sensibilizuar më shumë se çdo gazetë tjetër. Gazeta “Telegraf”, vazhdimisht, ka publikuar ankesat, sugjerimet dhe projektet e zgjidhjes optimale dhe të drejtë të paraqitura në shoqatat e pronarëve, por ato kanë rënë në vesh të shurdhër, çka tregon mungesën e vullnetit të politikës për të zgjidhur problemin e pronës, konform detyrimeve kushtetuese. Kërkesat për zbatimin e Kushtetutës nga vetë Shteti, mund të tingëllojnë të çuditshme për Ambasadorin e ri të SHBA-së z. Donald Lu, pasi për botëkuptimin e tij, ai nuk mund të imagjinojë se një shtet i shpallur demokratik prej 24 vjetësh, anëtar i NATO-s dhe që pretendon të futet në BE, akoma nuk ka përfunduar kthimin fizik të pronës së grabitur, por vepron me ligje që shkelin të drejtën e pronës së trashëguar, sepse shkelet Kushtetuta. Ky vendim i GJEDNJ shtron domosdoshmërinë e konsensusit për përmirësimin pa hezitim të legjislacionit dhe dhënies fund të korrupsionit me pronat dhe korrupsionit në drejtësi. Strasburgu është një zgjidhje dhe ndofta më e shpejtë se ajo që mund të japë sot AKKP, e bllokuar prej vitesh ne procesin e kthimit fizik të pronave. Kompensimi për të zëvendësuar pronat, që normalisht mund të kthehen duket i papranueshëm nga GJEDNJ, veç faktit që kërkon një kosto që nuk mund ta përballojë as thesari i shtetit të SHBA-së. Zgjidhja më e mirë dhe pa kosto është konsensusi i drejtuesit të maxhorancës z. Edi Rama dhe atij të opozitës z. Lulzim Basha për miratimin e një ligji për të caktuar si detyrim të Shtetit që secili të ketë të drejtën të gëzojë pronën e tij të trashëguar, konform Nenit 181 të Kushtetutës. Këshillat dhe opinionet e ambasadorëve do ta përshpejtonin këtë proces që do të shënonte një hop cilësor në luftën për dekriminalizimin e Shtetit.
