Statusi i minatorit, qeveria refuzon projektin e LSI-së

884
Qeveria ka dhënë mendim negativ për projektligjin për statusin e minatorit, i propozuar nga deputeti i LSI, Përparim Spahiu, që është zgjedhur në qarkun e Dibrës, që përfshin edhe qytezën minerare të Bulqizës. Qeveria deklaron se projektligji për statusin e minatorit sjell efekte negative në skemën e pensioneve dhe buxhetin e shtetit, dhe propozimi i bërë nuk shoqërohet me kostot e detajuara financiare. Po ashtu, sipas qeverisë projektligji përmban edhe shkelje kushtetuese dhe të Kodit të Punës. Por kur e prezantoi projektligjin në komisionin parlamentar të punës deputeti Spahiu tha se ai priste që efektet financiare të përballohen nga shtimi 5% i kontributeve të sigurimeve shoqërore për minatorët, që sipas tij do të ndahen mes punëmarrësit dhe punëdhënësit, kurse diferencat që krijohen do të përballohen nga buxheti i shtetit. Këto argumente deputeti i mbështeste edhe në referenca ligjore. Projektligji për statutin e minatorit synon të rritë pagën mimale për punonjësit e nëntokës dhe të ulë vitet e daljes në pension për minatorët që kanë mbetur pa punë për shkak të reformave. Projektligji parashikon edhe rritjen e mbështetjes sociale për minatorët dhe ish-minatorët. Në industrinë e minierave në Shqipëri deri në vitet ’90 kanë qenë të punësuar mbi 40 mijë persona. Mendimi i qeverisë pritet të diskutohet në hënën në komision parlamentar. Por duke dhënë mendim negativ për këtë projektligj të propozuar nga deputeti i LSI-së, qeveria zotohet se do të hartojë vetë një projektligj të ri për statusin e minatorit brenda vitit 2018.
Sigal