“The Economist”: Situata e krijuar me “Danske” ka ndikuar negativisht dhe në banka të tjera Evropiane
Rritet numri i bankave të përfshira në skandalet e pastrimit të parave
Skandali i pastrimit të parave që goditi Bankën “Danske” vitin e kaluar ishte tronditës, raporton “The Economist”. Filiali estonez i huadhënësit danez dyshohet se ka kaluar deri në 230 miliardë dollarë fonde nga ish-shtetet sovjetike. Pasojat tronditëse të kësaj situate, fatkeqësisht duket se kanë ndikuar edhe në banka të tjera evropiane. Aksionet në “Raiffeisen Bank International” të Austrisë ranë me më shumë se 12% më 5 mars, pas paraqitjes së një ankese, sipas së cilës banka akuzohej për një “neglizhencë të madhe”, ose për shkak të pranimit të fajit në lidhje me rrjedhjen e parave të dyshimta nga Banka “Danske”. “Raiffeisen”, nga ana e saj, thotë se është duke hetuar në lidhje me këto akuza. “Raiffeisen” është banka e fundit që po hetohet për pastrimin e parave nga skajet lindore të Evropës. Banka “Nordea”, me bazë në Helsinki dhe “Swedbank” e Suedisë, janë gjithashtu të përfshira në çështjen e Bankës “Danske”. Që në momentin kur Swedbank u përfshi në skandalin për pastrimin e parave të Bankës “Danske”, çmimi i aksioneve të saj ka rënë me 18%. Disa banka janë të përfshira në një skemë të veçantë të quajtur “Lavanderia Troika”, e cila po heton kryesisht ato banka të përfshira në pastrimin e parave nga skajet lindore të Evropës. Bankat evropiane, të dyshuara se kanë qenë të përfshira në pastrimin e parave nga Evropa Lindore, kanë humbur rreth 20 miliardë euro (22.6 miliardë dollarë amerikanë) ose edhe më shumë në vlerën e aksioneve të tyre në tregun e bursës gjatë periudhës së muajve të fundit. Shumat e parave që kanë kaluar nëpërmjet bankave të tjera nuk janë aq të larta sa ato të kaluara nëpërmjet Bankës “Danske”. Kështu, për shembull, Banka “Nordea” ka pastruar rreth 700 milionë euro, ndërsa 5.8 miliardë dollarë amerikanë janë raportuar se kanë lëvizur ndërmjet “Swedbank” dhe Bankës “Danske”. Padyshim, investitorët kanë arsye të forta për t’u shqetësuar. Edhe më shumë transaksione të dyshimta ka të ngjarë të zbulohen në ditët në vazhdim. Hetime po zhvillohen në Danimarkë, Estoni, Britani, Francë dhe Amerikë. Amerika është një prej shteteve që nuk e merr lehtësisht çështjen e pastrimit të parave. Në vitin 2012, ajo gjobiti me 1.9 miliardë dollarë amerikanë Bankën “HSBC”, pasi kjo e fundit pastroi paratë e drogës në Meksikë. Përveç gjobës, ajo instaloi edhe një sistem monitorimi. Edhe Evropa, nëse do të dojë, mund të bëhet më e ashpër në drejtim të trajtimit të çështjeve si pastrimi i parave. Kërkesat po rriten në drejtim të Bankës Qendrore Evropiane dhe Autoritetit Evropian Bankar, një agjenci e BE-së, se këto duhet t’u japin më shumë kompetenca mbikëqyrësve kombëtarë. Gjithashtu nuk mund të lëmë pa përmendur se skandale të tilla kanë pasoja të rënda për këto biznese. Askush nuk mund ta marrë me mend sesa punë i është dashur shefit të përkohshëm të Bankës “Danske” dhe ekipit të tij për të pastruar emrin e bankës dhe për të qetësuar krijimin e një situate kaotike, të cilat rrallë mund t’i shërbejnë për mirë një biznesi.
