Huatë që nuk kthehen në afat në banka kanë shënuar një rënie tjetër në korrik për të tretin muaj radhazi, duke zbritur në 11.19%. Ky është dhe niveli më i ulët i këtij viti.
Në dhjetor të vitit të kaluar, huatë me probleme zbritën në nivelin më të ulët në 7 vite, prej 11.08%, të ndihmuara dhe nga fshirja e kredive të këqija që kanë më shumë se tre vjet që nuk kthehen, nga bilancet e bankave. Më pas treguesi u rrit, për të arritur në 11.46% në prill dhe që prej asaj kohe morën sërish tendencën rënëse.
Sipas burimeve të Bankës së Shqipërisë, në rënien e kredive ka ndihmuar shlyerja e huave dhe ristrukturimi i kredive, si zgjatje afati dhe ulje e pagesave mujore, apo dhe fshirja e një pjese të huasë në këmbim të pagesës së pjesës tjetër.
Pak kohë më parë, Banka e Shqipërisë miratoi një plan shpëtimi të pagëzuar si “Qasja e Tiranës”, për bizneset që kanë dështuar në shlyerjen e kredive në banka, me vlerë mbi 8 milionë euro. Plani i shpëtimit, tashmë në fuqi, do të nisë të aplikohet në muajin shtator për 9 korporata, nga grupi i të 35 kompanive që ishin problematike në kthimin e huave.
Bizneset me kredi të keqe, vlera e së cilës i kalon 100 milionë lekët (rreth 8 milionë euro) në disa banka kanë mundësi të rinisin aktivitetin dhe të dalin nga gjendja e falimentit, të ndihmuara nga vetë bankat.
Rregullorja e pagëzuar me emrin “Qasja e Tiranës”, e ngjashme me “Modelin Podgorica”, synon të ristrukturojë të paktën 9 korporata të mëdha në vjeshtë, pjesë e 35 bizneseve të mëdha në vend që zotëronin 65% të kredisë me probleme në vitin 2015. “Qasja e Tiranës” u miratua së fundmi nga Këshilli i Mbikëqyrjes së Bankës së Shqipërisë dhe do të aplikohet në vijim për të gjitha bizneset që dështojnë të shlyejnë shumat e kredisë mbi 8 milionë euro.
Pas goditjes që bankat pësuan pas krizës ekonomike të vitit 2008 nga moskthimi i huave, të cilat kulmuan në 24,9% të totalit të kredisë së dhënë në shtator 2014, me vlerë mbi 1 miliard euro, institucionet ndërkombëtare financiare u angazhuan për të zgjidhur ngërçin që po mban peng kreditimin normal të ekonomisë sot e kësaj dite.
