Gjykata Kushtetuese ka lënë në fuqi pezullimin për ligjin për proçedurat tatimore deri në një vendim përfundimtar.
Gjatë ditës së sotme Gjykata Kushtetuese ka dëgjuar palët dhe argumentat e tyre lidhur me ligjin e procedurave tatimore.
Aty janë shprehur përfaqësues të Shoqatës së Tregtarëve, përfaqësues të Ministrisë së Financave dhe Avokatura e Shtetit, të cilët kanë dhënë argumentat e tyre lidhur me këtë ligj.
Kushtetuesja ka marrë në shqyrtim argumentat e dhëna prej tyre, ndërkohë që ka lënë në fuqi pezullimin e ligjit deri në marrjen e një vendimi përfundimtar që pritet të dalë pas disa javësh.
Shoqata e Tregtarëve kërkoi shfuqizimin e ligjit për proçedurat tatimore duke argumentuar se gjobat janë jo proporcionale, cënojnë lirinë ekonomike dhe pronën private.
Ndërkohë që Ministria e Financave dhe përfaqësues të Qeverisë i kanë kundërshtuar këto argumenta duke deklaruar se këto masa janë ndërmarrë për të luftuar informalitetin.
Në përfundim Kryetari i Shoqatës së Tregtarëve ka deklaruar se diskutimet në seancë kanë nxjerrë në pah faktin se Shoqata e Tregtarëve ka më shumë përparësi ligjore në ankimimin e këtij ligji.
Tashmë do të duhet të presim dhe disa javë për të marrë vendimin përfundimtar lidhur me këtë çështje.