Papa Francesko ka zhvilluar dje një vizitë surprizë në një dyqan optik në qëndër të Romës, vetëm pak hapa larg nga sheshi antik “Piazza del Popolo”.
Ati i Shenjtë ka mbërritur me një makinë deri më hyrje të dyqanit, pa asnjë roje pranë, i shoqëruar vetëm nga shoferi i tij. I qetë e i vetëm i është drejtuar dyqanit optik, një nga më të njohurit e zonës, duke u rrethuar menjëherë nga një turmë qytetarësh e turistësh me dëshirën e madhe për t’i shtrënguar duart.
“Kur ke nevojë të ndryshosh syzet, ku shkohet? Veç tek okulisti”, u shpreh Papa Francesko duke i dhënë përgjigje brohoritjeve kurioze të turmës që rrethuan menjehërë zonën.
Papa Francesko si një klient i zakonshëm ka bashkëbiseduar me pronarin e dyqanit duke pretenduar vetëm ndryshimin e lenteve e jo syze të reja. “Më lë të paguaj aq sa më takon”, i ka kërkuar Papa Francesko, pronarit të dyqanit. Nuk dua të shpenzoj, nuk kam nevojë për syze të reja veç të ndryshoj lentet.”
Ati i Shejtë ka qëndruar rreth 40 minuta në optikën duke u larguar po i vetëm në shoqërinë e shoferit të tij, e pasi ka shtrënguar duart njerëzve të shumtë që kishin populluar hyrjen e dyqanit.
Pronari i optikës Aleksadër Spieza ka treguar për mediat se ishte i informuar për këtë vizitë të Papa Franceskos e kishin lënë takim për të zhvilluar këtë vizitë okuliste.
“Kohë më parë, tregoi ai, imzot Gullielmo Karcher, një klerik që banon aty pranë e punon në Vatikan, më solli për të riparuar një palë syze, e më tha se ishin të Papa Franceskos. Dëshëroja t’i dhuroja një palë syze të reja, tha ai por Atit të shenjtë kishte refuzuar duke kërkuar vetëm riparimin e syzeve e duke paguar 5 euro për punën.”
Nga ai moment kjo kartmonedhë konservohet me fanatizëm nga pronari i dyqanit.
Pas udhëtimit në Brazil, gjatë muajit korrik Papa Francesko qe shprehur se “duhet të jemi normal”, shprehje të cilën e ka kthyer në simbol të papatit të tij e që e dëshmon dhe me këtë vizitë suprizë si të një personi normal që ka nevojë për një kotroll tek okulisti.