Një tjetër tragjedi ka ndodhur në brigjet turke, pasi janë mbytur 17 emigrantë sirianë, të cilët ishin nisur drejt Greqisë, por mjeti i tyre lundrues është fundosur. Të gjithë viktimat besohet të jenë sirianë, ndërsa mes tyre, sipas raporteve të mediave lokale, ka 5 gra e 5 fëmijë. Personat që humbën jetën në incidentin më të fundit të kësaj natyre kanë qenë të bllokuar në kabinën e anijes që përdorej për udhëtarët. Ndërsa 20 emigrantë të tjerë, të cilët ndodheshin në kuvertë dhe mbanin veshur jelekë shpëtimi, kanë shpëtuar që të gjithë. Anija e fundosur besohet të jetë nisur nga brigjet e fshatit Gumusluk, pranë pikës turistike të Bodrumit, ku vdiq në fillim të muajit 3-vjeçari sirian Aylan Kurdi.
