Zëvendëskryeministri dhe ministri i Jashtëm i Kosovës, Hashim Thaçi, priti sot në një takim pune drejtorin e Departamentit Amerikan të Shtetit të Zyrës për Çështje të Evropës, Thomas Yazdgerdi, të shoqëruar nga ambasadorja e Shteteve të Bashkuara të Amerikës, Tracey Ann Jacobson.
Në takim u bisedua për zhvillimet e fundit në Kosovë, me theks të veçantë në themelimin e Gjykatës Speciale, dialogun mes Kosovës dhe Serbisë si dhe konsolidimin e shtetit të Kosovës në arenën ndërkombëtare.
Zëvendëskryeministri Thaçi u shpreh se miqësia mes Kosovës dhe SHBA-së është e veçantë dhe se populli i Kosovës është i vetëdijshëm se nuk do të gëzonte lirinë dhe pavarësinë sikur të mos kishte pasur përkrahjen e Shteteve të Bashkuara të Amerikës.
Thaçi tha se Kosova është bërë shembull për rajonin për bashkëpunim ndërfqinjësor dhe se kjo është arritur falë procesit të vështirë, por të suksesshëm të dialogut mes Kosovës dhe Serbisë.
Duke folur për Gjykatën Speciale, zëvendëskryeministri Thaçi u shpreh se Kosova nuk do t’u shmanget përgjegjësive dhe obligimeve ndërkombëtare që ka.
“Themelimi i Gjykatës Speciale është në interes të Kosovës. Institucionet e Kosovës do të përkujdesen që kredibiliteti i vendit si dhe i miqve të saj të mos cënohen”, tha zëvendëskryeministri Thaçi
