Bashkësia Fetare Islame ndau rreth 300 pako ushqimore dhe ndihma në të holla prej 2 milion denarësh për banorët e prekur nga vërshimet e 3 gushtit në rajonin e Tetovës. Kryetari i BFI-së Sulejman Rexhpi i cili shpërndau personalisht ndihmat në Reçicë të Madhe dhe Shipkovkicë, sqaroi se ndihmat janë mbledhur në kuadër të aksionit humanitar që ka iniciuar BFI-ja në të gjitha xhamitë e vendit. “Reçica është e goditur, jashtëzakonisht e dëmtuar me rastin e fatkeqësisë natyrore që ndodhi. Prandaj ne e kishim obligim si BFI në Maqedoni, përmes besimtarëve tanë që të bëjmë përpjekje që dëmtimet që i ka përjetuar kjo pjesë e popullit tonë e cila është pjesë e organizmit tonë të përbashkët pak a shumë të solidarizohemi dhe të bëjmë përpjekje ta zbutim situatën”, tha Sulejman Rexhepi, Kryetar i BFI-së.
Ndihmat do të shpërndahem përmes imamëve të xhamive të zonave të prekura, ndërkohë që Myftinia e Tetovës tashmë ka bërë listën e familjeve që janë prekur nga përmbytjet. “Në bashkëpunim me Këshillat e xhamive dhe shtabet e emergjencës me imamët e xhamive ku kanë ndodhur dëmtime nga kjo fatkeqësi kemi bërë listat e shtëpive dhe familjeve të dëmtuara dhe kemi bërë rangimin e dëmtimit sa është sasia e dëmtimit diku ka më tepër dhe diku më pak jemi munduar që të jemi më objektiv në këtë rast dhe shpresojmë se ndihma e dhënë nga popullata do të zë vendin e duhur”, theksoi Qani Nesimi, Myfti i Myftinisë së Tetovës. Përveç produkteve ushqimore, pakot përfshijnë edhe mjete higjienike. Ndërkohë, nga BFI-ja njoftuan se në kuadër të këtij aksioni, në ditët në vijim do të shpërndahem edhe 300 pako të tjera për të gjitha familjet që pësuan dëme nga përmbytjet në Tetovë.
