Tërmeti 6.1 ballë shkund Japoninë, raportohet për tre të vdekur e dhjetëra të plagosur

513
Sigal

Të paktën tre persona kanë vdekur dhe dhjetëra të tjerë janë plagosur, si pasojë e një tërmeti të fuqishëm që ka përfshirë qytetin Osaka në perëndim të Japonisë.

Agjencia e lajmeve “Kyodo” ka raportuar se në mesin e të vdekurve janë një vajzë nëntëvjeçare dhe dy burra rreth 80 vjeç.

Tërmeti ka thyer dritaret dhe ka shkatërruar disa ndërtesa, kanë njoftuar zyrtarët.

Agjencia japoneze për Meteorologji ka njoftuar se tërmeti i 18 qershorit ka qenë me magnitudë 6.1 shkallë.

Tërmeti ka ndodhur në orët e mëngjesit kur ka shumë lëvizje të qytetarëve, dhe pas tij janë ndërprerë shërbimet e trenave dhe metrove në zonën Osaka.

Zyrtarët kanë thënë se reaktorët bërthamorë në këtë rajon nuk janë prekur.

Mediat lokale kanë raportuar se rreth 170,000 shtëpi në rajon kanë mbetur pa energji eletrike.