Shkolla përfshihet nga flakët, 27 nxënës të vdekur në Liberi

155

Një zjarr në një shkollë islamike në Liberi ka vrarë të paktën 27 nxënës.

“Fëmijët po mësonin Kuranin kur nisi zjarri,” tha zëdhënësi i policisë, Moisiu Carter.

Zjarri besohet se shpërtheu në orët e para të mëngjesit. Carter u shpreh për Reuters se dy nxënës të mbijetuar u dërguan në spital.

Ndërkohë policia tha për BBC se janë ende në kërkim të kufomave nën rrënojat e ndërtesës.

Presidenti George Weah në një postim në Twitter i shprehu ngushëllimet familjeve të prekura nga kjo tragjedi.

“Lutjet e mia shkojnë për familjet e fëmijëve që vdiqën mbrëmjen e kaluar në qytetin Paynesville, si rezultat i një zjarri vdekjeprurës që përfshiu ndërtesën e shkollës së tyre. Kjo është një kohë e vështirë për familjet e viktimave dhe të gjithë Liberinë,”-tha ai.

Zyrtarët thanë për AFP se viktimat janë të moshës 10 deri në 20 vjeç.

Carter shtoi se zjarri ishte shkaktuar nga një shkëndijë elektrike, por që hetimet po vazhdojnë.