Presidenti amerikan Donald Trump nënshkroi një urdhër të ri ekzekutiv, që pezullon përkohësisht pranimin e refugjatëve dhe ndalon hyrjen në vend të njerëzve nga gjashtë vende me shumicë myslimane
Urdhri është një version i rishikuar i atij të nënshkruar nga presidenti në fund të janarit, që argumentonte se ndalimi i përkohshëm ishte i nevojshëm për të rishikuar procesin e kontrolleve të personave që hyjnë në vend si dhe mbrojtjen e sigurisë kombëtare. Urdhri ndalonte hyrjen në Shtetet e Bashkuara të personave nga Iraku, Irani, Siria, Libia, Jemeni, Somalia dhe Sudani.
Zyrtarët thanë se urdhri i ri e heq Irakun nga lista, por vendet e tjera do të mbeten në të.
Ndalimi i përkohshëm i refugjatëve do të përfshihet edhe në urdhrin e ri, por dokumenti i ri nuk veçon sirianët për një ndalim të papërcaktuar.
Urdhri ekzekutiv po shqyrtohej prej disa javësh.
Një gjykatë federale e apelit ndaloi zbatimin e urdhrit fillestar, një vendim që administrata Trump ka vazhduar ta kundërshtojë ndërsa harton versionin e rishikuar. Sfidat ligjore të ngritura nga disa shtete mund ta çojnë çështjen deri në Gjykatën e Lartë.
