Kryeministri hungarez, Viktor Orban, ka deklaruar se Bashkimi Europian ka përgatitur një plan sekret për të sjellë plot 500 mijë emigrantë që ndodhen aktualisht në Turqi, në shtetet e kontinentit të vjetër. Ai tha se një vendim i tillë do të anonçohet në Berlin gjatë ditëve të ardhshme. Sipas tij, një skemë e tillë është propozuar edhe më herët nga BE-ja, por u refuzua nga disa prej liderëve europianë.
“Ka një vendim për të cilin është punuar në fshehtësi, por që do të dalë në dritë gjatë ditëve të ardhshme. Vendimet e koalicionit tonë deri më tani kanë qënë absurde. Fluksi i emigrantëve është përdorur edhe si rrugë për transportimin e terroristëve nga Siria, Iraku dhe Afganistani drejt Europës.”
Lajmi i përcjellë nga Orban është përforcuar edhe nga deklarata e Kryeministrit holandez, Mark Rutte, i cili tha se BE-ja po konsiderojnë mundësinë e pranimit të një numri mjaft të lartë emigrantësh. Megjithatë, zv. Presidenti i Komisionit Europian, Frans Timmermans, u shpreh nga Brukseli se deklarata e kreut të egzekutivit hungarez ishte e pabazë.