Lista serbe kthehet në institucionet e Kosovës

641
Përfaqësuesit e Listës serbe, subjektit kryesor politik të serbëve të Kosovës kanë vendosur që të kthehen në institucionet e vendit, gati gjashtë muaj pas bojkotimit të tyre.
Në tetor të vitit të kaluar, përfaqësuesit politik serb në institucionet e Kosovës, patën vendosur ngrirjen e funksioneve të tyre në qeverinë dhe parlamentin e Kosovës, për shkak të zemërimit ndaj miratimit të ligjit nga ana e parlamentit të Kosovës për kombinatin metalurgjik Trepça, i cili është vënë nën administrimin e qeverisë.
Shefi i Grupit parlamentar të Listës serbe, Slavko Simiç, tha se nëpërmjet institucioneve presin që të shtyjnë përpara interesat e popullit serb.
“Kërkojmë që sa më shpejt të nisë procesi për themelimin e Asociacionit të Komunave me shumicë serbe dhe natyrisht që t’u kundërvihemi të gjitha atyre ligjeve dhe proceseve të cilat nuk janë në interesat tona kombëtare, që nuk janë në interesin e popullit serb që jeton në Kosovë dhe natyrisht t’u kundërvihemi të gjitha proceseve që kërcënojnë interesat e vlefshme të komunave me shumicë serbe dhe popullit serb që jeton në Kosovë”, tha zoti Simiç.
Vendimi i institucioneve të Kosovës që të ndryshojnë mandatin dhe detyrat e Forcave të Sigurisë ka nxitur reagimin e Beogradit zyrtar dhe përfaqësuesve politik të serbëve të Kosovës, të cilët kundërshtojnë këtë nismë duke e cilësuar atë të rrezikshme për rajonin. Shefi i Listës serbe tha se një gjë të tillë nuk do të duhej të bëhej pa mbështetjen e të gjithëve.
“Ne nuk duam të marrim pjesë në një proces që shkatërron legjitimitetin e Rezolutës 1244 të Këshillit të Sigurimit të Kombeve të Bashkuara, për ne kjo rezolutë është ende e vlefshme dhe mendojmë se nuk është e nevojshme që të hyjmë në një marrëveshje që shndërrimi i Forcave të Sigurisë në ushtri të Kosovës të bëhet pa mbështetjen e bashkësisë ndërkombëtare, të NATO-s dhe pa ndryshimet kushtetuese dhe natyrisht pa mbështetjen e komuniteteve pakicë në Kosovë”, tha ai.
Presidenti i Kosovës Hashim Thaçi dhe kryetari i parlamentit Kadri Veseli kanë shtyrë përpara çështjen e ndryshimeve për detyrat dhe misionin e Forcave të Sigurisë, por mënyra e tyre ka nxitur edhe reagimin e NATO-s dhe ambasadës amerikane që u shprehën të shqetësuara me paralajmërimet për ndërrimin e mandatit të kësaj force pa ndryshime kushtetuese.
Edhe, kryeministri i Kosovës Isa Mustafa, ka shprehur mbështetje për formimin e ushtrisë por siç thotë ai duke iu qëndruar besnikë marrëdhënieve me partnerët ndërkombëtar, siç janë Shtetet e Bashkuara të Amerikës dhe NATO.
Shndërrimi i mandatit dhe detyrave të Forcave të Sigurisë ka gjetur mbështetje te shumica e partive politike në Kosovë, të cilat kanë shprehur gatishmërinë për të votuar këto ndryshime, por kanë kërkuar bashkërendim me faktorin ndërkombëtarë.
Sigal