131 persona kanë mbetur të vdekur pas një sulmi ajror në një lokal ku po zhvillohej një dasmë në Jemen. Lajmi bëhet me dije nga Organizata e Kombeve të Bashkuara, sipas të cilës një raketë ka goditur dy tenda në një fshat pranë portit Moka, ku një person i lidhur me rebelët Huthi ishte duke festuar martesën e tij. Koalicioni i udhëhequr nga Arabia Saudite, i cili ka bombarduar objektet e zëna nga rebelët për gjashtë muaj, ka mohuar përgjegjësinë për sulmin.
Kombet e Bashkuara kanë dënuar shpërfilljen e jetëve të njerëzve nga të gjitha palët. Rreth 5 000 njerëz, përfshirë 2 355 civilë, janë vrarë nga sulmet ajrore dhe luftimet në terren qysh më 26 mars, kur rebelët Huthi kanë detyruar presidentin e Jemenit të largohet nga vendi.
