Një fshat malor italian ka gjetur një mënyrë interesante për të tërhequr banorë të rinj, sepse popullsia aty po pakësohet dita ditës. Autoritetet lokale të këtij fshati ofrojnë 2 mijë euro shpërblim për çdo banor të ri. Kjo është mënyrë që ata kanë gjetur për të nxitur shtimin e popullsisë në provincën veriore që po braktiset dita ditës. Bëhet fjalë për komunën veriore të Bormidës në rajonin e Ligurias. Autoritetet lokale ofrojnë 2 mijë euro shpërblim për këdo, që ble apo merr me qira një banesë, mjafton të shpërngulet në këtë fshat. Drejtuesi i administratës lokale Daniele Galiano thotë se me 2 mijë euro mbulohet një qira e zakonshme për një vit në banesat e fshatit. Çmimi i qerasë varion nga 50 euro në muaj për banesat e vogla në 120 euro për ato më të mëdha. Fshati panoramik ka vetëm 394 banorë dhe ky numër nuk është ndryshuar për vite të tëra.