Vetëm pak çaste pas rezultatit që e nxori fitues dhe President të SHBA-ve, Donald Trump, iu drejtua me një fjalë përshëndetëse gjithë votuesve, atyre që mbështetën dhe atyre që nuk e votuan.
Ai premtoi se të gjithë bashkë “ne do ta rindërtojmë këtë vend dhe ta rinovojmë Amerikën tonë. Burrat dhe gratë e harruar të këtij vendi, s’do jenë më të tillë. Do të rindërtojmë infrastrukturën e këtij vendi”.
Trump nuk harroi të falenderonte gjithë ata që i ndenjën pranë në këtë garë, duke nisur nga prindërit, vëllai, motrat, fëmijët dhe gjithë mbështetësit.
“Do të bëjmë një punë që ju do të jeni krenar për presidentin tuaj, unë e dua këtë vend”- e përfundoi fjalën e tij Trump.
Donald Trump, biznesmen miliarder, fitoi zgjedhjet presidenciale në Shtetet e Bashkuara. Ai do të udhëheqë Shtëpinë e Bardhë në katër vjetët e ardhshëm. Kandidati republikan, Donald Trump, është zgjedhur presidenti i 45-të i Shteteve të Bashkuara.Trump, manjat i pasurive të patundshme, pa përvojë politike, ka mposhtur rivalen demokrate, Hillary Clinton.
Trump ka premtuar se do ta bëjë Amerikën “të madhe përsëri”, me krijimin e më shumë vendeve të punës dhe me uljen e taksave.