Diaspora mbështet kandidatët shqiptarë për zgjedhjet në Zvicër

518
Ministri i Diasporës, Valon Murati, takoi në Cyrih të Zvicrës kandidatët shqiptarë për deputetë në parlamentin qendror zviceran. Duke shprehur kënaqësinë për faktin se të rinjtë shqiptarë nuk qëndrojnë indiferentë dhe kanë guximin t’i hyjnë një gare të tillë zgjedhore në funksion të integrimit sa më të madh në jetën publike zvicerane, Murati tha se “diaspora është ajo pjesë e kombit shqiptar që ka dhënë kontribut të fuqishëm dhe ka luajtur një rol të jashtëzakonshëm për çështjen kombëtare në të gjitha kohërat dhe për të gjitha situatat”. Më tej, ministri i Diasporës theksoi se momentalisht diaspora është në tranzicion, në një pikë kthese, prej fazës së mobilizimit për të ndihmuar çlirimin e Kosovës- në një fazë të integrimit dhe fuqizimit në jetën politike, si formë e mundësi tjetër e ndihmës për atdheun.
“Pavarësisht rezultateve tuaja si kandidatë në këto zgjedhje, rruga në të cilën jeni futur garanton suksese të padiskutueshme. Inkuadrimi, e eventualisht, fitim in i ndonjë mandati në parlamentin zviceran përbën kulmin e integrimit të shqiptarëve në Zvicër”, porositi Murati. Ai porositi që shqiptarët të jenë sa më të organizuar si komunitet dhe në këtë unitet të tyre të mos reflektojë raporti i partive politike në Kosovë. Sipas një komunikate të Ministrisë së Diasporës, të gjithë kandidatët për deputetë në Parlamentin e Zvicrës të pranishëm në këtë takim shprehën falënderimin e tyre për vizitën dhe mbështetjen e ministrit Murati. Ata gjithashtu falënderuan partitë zvicerane për mundësinë e dhënë që të jenë pjesë e listave të tyre zgjedhore, si dhe mbështetjen e vazhdueshme për çështjen e Kosovës. Angazhimin e tyre e konsideruan shumë të rëndësishëm në integrimin në jetën publike dhe atë shoqërore në përgjithësi, fuqizimin e rolit të shqiptarëve në Zvicër dhe përmirësimin e imazhit. Ministri Murati dhe të gjithë kandidatët kërkuan nga shqiptarët që jetojnë në Zvicër që të dalin në këto zgjedhje dhe t’i votojnë ata.
Sigal