BE rregulla të reja për vizat, miratohen ndryshimet

539
Sigal

BE ka ndryshuar ligjin për vizat për të përmirësuar kushtet për udhëtimin ligjor dhe për të forcuar luftën kundër migracionit të paligjshëm, njoftoi sot Këshilli i BE-së.

Ministrat e Drejtësisë dhe të Punëve të Brendshme të BE në një takim në Luksemburg sot kanë konfirmuar rregulla të reja që do t’u lejojnë udhëtarëve nga një vend që i nënshtrohet regjimit të vizave për të bërë procedura më të shpejta dhe më të qarta.

Ndryshimet përfshijnë dorëzimin e kërkesës për vizë për një periudhë prej 6 muaj deri në 15 ditë para udhëtimit, plotësimin elektronik dhe nënshkrimin e formularëve të aplikimit, si dhe zgjatjen graduale të periudhës së vlefshmërisë së vizave me shumë hyrje për udhëtarët e rregullt nga një deri në pesë vjet.

Rregullorja e re gjithashtu rrit taksën e përpunimit të të dhënave, e cila tani do të arrijë në 80 euro, dhe shuma e saj do të rishikohet çdo tre vjet.

Këshilli i BE-së deklaron se rregullorja e miratuar do të përmirësojë bashkëpunimin me vendet e treta lidhur me ri-pranimin e emigrantëve të paligjshëm, nëpërmjet një mekanizmi të ri.

Brenda kuadrit të këtij mekanizmi, Komisioni do të vlerësojë rregullisht bashkëpunimin me vendet e treta në drejtim të ri-pranimit.

Në rast se një vend nuk bashkëpunon, Komisioni do t’i propozojë Këshillit të vendosë për zbatimin e masave kufizuese në lidhje me përpunimin e kërkesave, por edhe në lidhje me shumën e tarifave të vizave.

Nga ana tjetër, nëse vendi bashkëpunon sa i përket ri-pranimit, Komisioni mund të propozojë që Këshilli të marrë një vendim për zvogëlimin e taksave të vizave, duke shkurtuar kohën e nevojshme për të vendosur mbi kërkesat për viza ose për të rritur kohëzgjatjen e vizave për hyrje të shumëfishta.