Ministren e arsimit e kanë braktisur të gjithë!

493
Nga Gani MURATI

Çfarë dështimi total në arsim! Sot nuk do ta lodh lexuesin me analiza për ligjin e arsimit të lartë. Ato analiza janë bërë. Qysh orën e parë të botimit të draftit të tij të parë, bashkë me kolegë të tjerë, një dorë pedagogësh, e denoncuam si të prapambetur, pa kulturë, jashtë kohe, dhe që nuk sillte asnjë përmirësim në gjendjen problematike të arsimit në vend. Sot nuk është koha për analiza sepse jemi pas katër vjetësh premtimesh në pikën më të ulët që ka qenë ndonjëherë arsimi shqiptar, dhe tani kemi rezultatet, dhe jo parashikimet. Pse them: I mjeri ligj i arsimit të lartë? Sepse ai ndodhet tani i pafat, i pambrojtur nga askush, i përbuzur nga gjithkush me përjashtim të ndonjë servili dhe propagandisti që nuk ka lidhje as me shkencën, as me arsimin, as me logjikën, por thjesht mendon si të mbushi xhepat e shpuara me para. Atë po e sulmojnë edhe ata që e bënë të hyjë në fuqi me anë të fuqisë absurde të votave që vetëm në këtë fushë nuk vlejnë më shumë sesa një thes me letra pa vlerë. E kanë braktisur një pjesë e madhe e atyre deputetëve që e votuan. Ditët e fundit lidhur me maturën shtetërore si edhe për arsimin, ose edhe për ligjin e arsimit të lartë, në përgjithësi, janë hedhur kritika therëse dhe të drejta nga përfaqësuesit e lartë të LSI. As më pak e as më shumë është deklaruar se edhe kur e kanë votuar këtë gjoja reformë, ata e kanë bërë thjesht për të mos prishur ose krijuar probleme për koalicionin politik në fuqi edhe sot. Pra ligji dhe gjoja reforma është kaluar për motive thjesht politike, për modus vivendi politik, për kombinacionesh politike. Çfarë gjendje komike për reformën arsimore të dështuar, për ministrinë e arsimit, për shumicën parlamentare, si edhe për të gjithë ata kalemxhinj dhe financues okultë të justifikimeve mediatike në mbështetje të këtij krimi që bëhet për ditë ndaj arsimimit të rinisë shqiptare! Kështu gjoja reforma arsimore ka humbur të gjithë legjitimitetin moral dhe politik përderisa atë tani e kritikojnë edhe ata që ishin të domosdoshëm dikur për ta votuar dhe ta bënin të vinte në forcë. As LSI, dhe besoj as LBRA nuk i vinë në mbështetje më asaj që ndodhi, dhe që shumë nga ne pedagogët nuk lamë forum, instancë dhe mënyrë pa përdorur për ta diskredituar, kritikuar. Ne nuk e ndaluam dot implantimin e së keqes, por sot shohim me kënaqësi që anijen e gjoja reformës së arsimit të lartë e kanë lënë me të drejtë të gjitha fuqitë ligjore dhe parlamentare. Reforma arsimore bëhet komike nga kritikat e sotme që vijnë edhe nga ana e partisë së cilës i përket edhe zëvendës ministrja e arsimit, e cila, sigurisht, grua e mençur, nuk ka qenë ajo që e ka iniciuar dhe mbështetur ndonjëherë në publik këtë platformë që po mbytet. Nga ana tjetër, zonja ministre i hyn një debati në publik me LSI, ndërkohë që ka në krahë të saj bashkëpunëtoren më të ngushtë që ndan sot të njëjtat përkatësi politike me LSI në therëse në kritike. Kjo nuk është kakofoni, kjo është skizofreni politike, një reformë që po kalon sot etapën e vet komike. Po e poshtëron edhe opozita. Kryetari i opozitës, para brohoritjes të të të rinjve, në bulevard, në rrugë, brenda në çadër, tha se një ndryshim qeverie, një qeverisje e re, do të bënte që kryeministri i ardhshëm do ta anulonte qysh orën e parë ligjin e mbrapshtë të arsimit të lartë që ka si synim thjesht të kalojë likujditete financiare nga xhepat e qytetarëve drejt propagandës proqeveritare, duke spekuluar gjoja me diplomime shumë të dyshimta nga pikëpamja e cilësisë së tyre dhe të testuara shkel e shko nga agjenci shtetërore, edhe ato të politizuara. Pra, ligji i arsimit të lartë jo vetëm kalon tani fazën e tij komike të rënies të së vjetrës, por edhe as bëhet fjalë të krijojë ndonjë konsensus politik sikurse do ta donte një reformë e tillë. Sepse ai u fut në forcë me anë të forcës, dhunës së kartonëve, të cilët nuk i ka më. E mjera reformë arsimore, komikja ajo, sepse tani kryeministri na thotë se do ta kishte flakur edhe vetë ministren e arsimit nga kabineti qeveritar po qe se nuk do të ishte nevoja për të administruar maturën. Çfarë argumenti që nuk ka forcë bindje! Pse ministri i shëndetësisë nuk do të thuhej njësoj se nuk e heqim dot sepse në spitale ka operacione kirurgjikale për t’u kryer? Pse ministrja merret me korrigjimet e fletëve të provimeve të maturës? Të shkretën ministre e kanë bërë dalje duke e fyer publikisht sikur të ishte ajo fajtore e vetme për gjendjen e mjerë të arsimit shqiptar, e bëri dalje edhe kryeministri i vet, që e ka degdisur andej nga Lezha, Kallmeti, Gjadri, a tutje për t’u ngjit në malet e Velës, për t’u marrë me propagandë politike! Gjendja është bërë vërtetë komike. Ndërkohë kërkimi shkencor ka mbetur në ajër dhe kuadri ligjor sikurse të ishte ndonjë fshat i bombarduar në Luftën e Parë botërore. Kudo gropa të zeza, boshe, mungesë kuadri juridik, vizionesh, prodhim letrash absurde. Qendra e studimeve albanologjike nuk dihet nëse është e mbyllur apo e hapur po të ishte sipas urdhrave dhe shkresave të ministrisë. Me mandate të tejkaluar dhe të dalë boje. Akademia e Shkencave e bllokuar dhe me grupe pune gjoja reforme në ministri që nuk prodhojnë asgjë që të qëndrojë në këmbë përpara edhe logjikës të një çilimiu. Gradat dhe titujt shkencorë vazhdojnë të jepen në kundërshtim me ligjin në fuqi sepse nuk ka akte nënligjore që të lejojnë rregullim normativ të tyre. Matura shtetërore prodhoi zemërim dhe indinjatë te të rinjtë sepse e konsideruan procesin jotransparent, dhe që nuk i lejonte të bënin zgjedhjet e lirshme të degëve të studimit. Pedagogët janë rënduar sepse nuk u paguhet kërkimi shkencor, operacione pune që kryejnë pedagogë në gjendje profesionale skllavërie, studentët që mbesin të papunë për shkak të mosorientimit të profileve të studimeve, nuk shpërblehet dhe nxitet puna për tekste të reja, kurse integrimi me arsimin evropian është në parametra të trishtueshëm. Fare pak në mos aspak diploma dyfishe dhe zhvendosje studentësh dhe pedagogësh në Perëndim. Shkollave universitare doktorale iu dha derma dhe vazhdojnë të qëndrojnë të mbyllura si arsimi shqiptar në Kosovë në kohën e Millosheviçit. Miliarda lekë të humbura për institucionet universitare. As bëhet fjalë për digjitalizimin e arsimit. Shkollat e mesme pa laboratorë, lidhje Interneti dhe ku bëhet mësim si dyqind vjet më parë. Po mbaron mandatin kjo qeveri dhe ende rregulloret dhe aktet nënligjore janë të pakryera. Ecet në boshllëk. Buxheti publik për arsimin në pikë të hallit, më i ulti në të gjithë kohërat! Militantët e partisë në pushtet u parashutuan gjithandej në këshillat administrative që drejtojnë me dorë të hekurt administrimin universitar. Kurrë politizimi nuk ka arritur këto maja as në periudhën moniste si deri më sot! Disa propagandistë të paguar që i frynin borive në favor të shpurës qeveritare që gjoja bënte reformën arsimore kanë heshtur. A thua se publiku i harron se çfarë kanë bërë! Heshtin me turp dhe pa përgjegjësi! Vetëm ndokush ende lufton i vetmuar me propagandë e dëlir, si jeniçerët që vazhdonin në kështjellë të rezistonin ndërkohë që lufta kishte tashmë përfunduar, kur situata është bërë komike, kur ligji ka rënë politikisht, moralisht, juridikisht, shkencërisht, kur ministres i thonë se do të ishte shkarkuar, por për nevoja pa lidhje, ende nuk po të shkarkojmë, por po të dërgojmë për “riedukim” andej nga Lezha për t’i sjellë vota partisë! Të shlyesh gabimet me qarkullim në rrethe! I mjeri ligj për arsimin e lartë! E mjera reformë në arsim! Komikja situatë !
Sigal