TIRANE – Po zhvillohet në Tiranë një seminar ku tema kryesore e diskutimit është ajo e arritjes së standardeve të kërkuara nga ndërkombëtarët përsa i përket edukimit për një sport të pastër pa doping. Seminari i quajtur Jo-Doping nga Komisioni Kombëtar Anti-Doping, i mbështetur nga Ministria e Arsimit dhe Sportit dhe UNESCO. Ndër të tjera në këtë seminar është diskutuar dhe prezantuar “Kodi Ndërkombëtar Anti-Doping” dhe ndryshimet në të për vitin 2015.
Në 1 janar të këtij viti hyri në fuqi “Kodi Ndërkombëtar Anti-Doping 2015”, së bashku me listën e re të substancave dhe metodave të ndaluara. Kodi i ri rrit dukshëm vigjilencën, investigimin, sanksionet dhe saktëson marrëdhëniet e tërë faktorëve, pjesëtarë të zhvillimit të procedurave e metodologjisë stërvitore.
Në këtë kuadër Shqipëria ka marrë miratimin e Agjencisë Botërore Anti-Doping (WADA) për të vënë në zbatim një rregullore të re të funksionimit të Komisionit Kombëtar Anti-Doping, në përputhje me Kodin Anti-Doping të WADA-s.
Seminari dy ditor zhvillohet në kuadër të zbatimit të Projektit “Zhvillimi i Programit Kombëtar të Edukimit dhe Zhvillimit të Procedurave Administrative të Komisionit Kombëtar Anti-Doping në forcimin e luftës kundër përdorimit të substancave dhe metodave të ndaluara në sport”.
Në fokus të punimeve dhe diskutimeve të këtij seminari janë çështje si: përmirësimi i legjislacionit në fushën anti-doping, edukimi anti-doping në shkollë, standardet ndërkombëtare të testimit, hetimit dhe të përjashtimit për terapi 2015, Shkeljet e rregullave anti-doping, etj.
Në përputhje me rregulloren e re, të miratuar nga Agjencisë Botërore Anti-Doping (WADA) si dhe me rekomandimet e ekspertëve të Këshillit të Evropës mbi organizimin ndërkombëtar anti-doping, MAS është e angazhuar në bashkëpunim me Komisionin Kombëtar Anti-Doping për arritjen e standardeve ndërkombëtare për një sport të pastër.
Në seminarin, ku i pranishëm ishte edhe Zëvendësministri i Arsimit dhe Sportit, Rauf Dimraj, u diskutua edhe për gjetjet e Raportit të Këshillit të Evropës për Komisionin Kombëtar Anti-Doping. Krahas aktorëve dhe faktorëve të rëndësishëm në fushën e sportit referoi edhe Këshilltari i Agjencisë Botërore Anti-Doping (WADA), Alessandro Donati.
