Detaje të reja kanë dalë nga hetimet e Prokurorisë për banesat e shembura pas tërmetit të 26 nëntorit në Durrës, i cili shkaktoi 51 viktima.
Mësohet se katër nga nëntë personat e shpallur në kërkim, të cilët akuzohen se janë përgjegjës për jetët e humbura, një ditë para se ta mësonin masën që ishte marrë ndaj tyre ishin larguar për në Itali.
Për të bërë të mundur kapjen e tyre, autoritetet shqiptare kanë vënë në dijeni homologët italianë, për të bërë të mundur lokalizimin dhe kapjen e të shpallurve në kërkim.
Ndërkohë që në Shqipëri vijojnë operacionet për kapjen e tre të kërkuarve të tjerë që fshihen në kryeqytet. Dy ndërtues dhe një inxhinier janë lokalizuar në Tiranë dhe po punohet për kapjen e tyre.
Hetimet vazhdojnë me të njëjtat ritme edhe nga Prokuroria e Krujës, e cila gjithashtu ka shënuar disa persona përgjegjës për jetët e humbura, mes tyre ka edhe funksionarë publikë.
Personat e shpallur në kërkim
1. Arben Qato pronar i Vila Palma
2. Dëshira Qato-shefe e urbanistikës në Kavajë (Gruaja e Arben Qatos)
3. Aldo Dakovelli, shef sektori në Kadastrën e Durrësit
4. Artemis Malko punonjës terreni në Kadastrën e Durrësit
5. Artur Cela, ish-drejtori i INUV
6. Flamur Gjuzi, ish-drejtori i ALUIZNIT Durrës
7. Artur Terziu, pronari i ‘Bar Barons’
8-9. Dy ndërtuesit e banesës së familjes Lala në Kënetë.
