Infrastruktura, mitmarrja, pastërtia, krevate dhe dhomat spitalore pa ujë mbeten në gjendje mjerave e të turpshme
Kaos, anarki, mungesë profesionalizmi, mungesë medikamentesh, mungesë shërbimi, korrupsion. Kjo është tabloja me të cilën ndeshet çdo pacient që halli e çon tek Spitali Vlorës. Asgjë nuk ka ndryshuar edhe pas ardhjes së drejtueses së re të “Rilindjes”, është ajo situate e cila edhe sot po u nxin jetën qytetarëve të Vlorës dhe ndonjë hallexhiu që rastis atje pas ndonjë aksidenti apo situate tjetër rënduese. Ky shkrim ka marrë spunto nga rasti i një qytetari nga Elbasani i quajtur I. Çeliku, i cili para 10 ditësh tek kalonte në aksin rrugor Vlorë-Himarë, ka pësuar një aksident të lehtë, dhe ndihmën e parë familjarët e tij menduan dhe kërkuan ta merrnin tek Spitali Rajonal i Vlorës. Pas peripecive me Policinë Rrugore, e cila kërkonte të bënte punën e saj edhe pse i plagosuri kërkonte ndihmën mjekësore, problemet dhe hallet vijuan tek Urgjenca dhe pavijonet e spitalit. Asnjë prej mjekëve dhe infermiereve, nuk afrohej veç momentit kur konstatuan se “nuk ka asgjë me rëndësi dhe rrezik jete”. Asnjë mjek dhe asnjë infermiere nuk afrohej dhe nuk u përgjigjej familjarëve të 44- vjeçarit I. Çeliku, për t’i bërë atij mjekimin, radiografinë, skanerin dhe gjithçka tjetër që lidhet me shërbimin spitalor. Ishte sanitarja e shërbimit ajo që u dhe familjarëve një recetë të mbushur me ilaçe dhe u tha atyre se “shkoni blini tek farmacia në krah të spitalit ilaçet dhe hajdeni t’ ja bëjmë mjekimin”. Ishte një tmerr dhe torturë e paparë. Veç blerjes së ilaçeve, të cilat kushtuan mbi 60 mijë lekë, historia vazhdoi duke paguar mjekun, infermieret, e sanitaret, radiografinë dhe gjithçka tjetër. Mungesa e medikamenteve dhe shërbimit, e kishte kthyer Spitalin e Vlorës në një kamp përqendrimi. Familjarët tregonin se, “dhomat dhe korridoret ishin të mbushur me pacientë, urgjenca që vinin çdo 20 minuta, një kaos i paparë, mungesë rregulli dhe shërbimi, askush nuk të vinte dhe të prekte me dorë, në rast se nuk paguaje. Do ti mbajmë mend gjatë ato 24 orë që qëndruam atje, njerëzit trajtoheshin si kavie, kurse ne nga rrethet si jashtë tokësorë dhe jo sikur ishim shtetas të këtij vendi”. Ankesave tona asnjë prej mjekëve dhe personelit nuk i përgjigje, asnjë prej tyre nuk mori mundimin të merrej seriozisht me rastin tonë. Fakti është se shërbimi spitalor mbetet shërbimi më përfolur në krejt sistemin shëndetësor në Shqipëri. Kjo situatë padyshim ka ardhur edhe si pasojë edhe mosndëshkimit të ish-drejtuesve të spitaleve në rrethe, të cilët pasi vodhën dhe shkatërruan gjithçka sot madje disa prej tyre mbajnë edhe poste të reja drejtuese. Shërbimi spitalor në shkallë vendi mbetet në krizë totale, me mungesë të theksuar medikamentesh, personeli, profesionalizmi, pajisjesh, etike, dhe gjithçka tjetër që sot propagandon me të madhe Ministria e Shëndetësisë dhe kreu i saj, Beqja. Asgjë nuk ka ndryshuar, pasi medikamentet blihen nga pacienti dhe familjarët në farmacitë që lidhen me mjekun, korrupsioni mbetet në shkallën më të lartë dhe ka krijuar sistemin e tij të imunitar, infrastruktura spitalore mbetet mjerane si në mesjetë, në dhomat e pavionëve mungon uji, pastërtia, krevatet, batanijet dhe çarçafët. Por sikur të mos mjaftonin këto, mitmarrja është fenomeni që tashmë po bëhet hapur fare në spitalet tona. Rasti në spitalin e Vlorës, është vetëm një fluskë e vogël moçali në kënetën e pistë në të cilën janë zhytur sot shërbimi spitalor në Shqipëri. Praktika e mosndëshkimit të mjekut dhe drejtuesit që abuzon me detyrën, abuzon me paratë e spitaleve, me fondet dhe ndihmat humanitare që vazhdojnë të vijnë nga jashtë, është kthyer në “edukatë pune” edhe për stafin e ri të Ministrisë Shëndetësisë. Rastet e denoncuara nga media duhet t’i shërbejnë ministrit Beqja për t’i hyrë një analize të thellë të situatës në të cilën po katandiset shërbimi shëndetësor dhe veçanërisht ai spitalor në Shqipëri. Mjekët janë kthyer në biznesmenë, ata luajnë poker me jetën e njeriut, pasurohen me para të pista, blejnë vila, pallate dhe bëjnë pushime luksi edhe pse denoncohen për korrupsion. Por duket se këtë situatë zoti Beqja ka vendosur ta ndryshojë me takime pune, të cilat zakonisht ka nisur t’i bëjë me vartësit e tij në MSH në fundjavë.