Sociologët: Vetmia po shton numrin e vetëvrasjeve

495
Sigal

213 persona janë vetëvrarë në vitin 2018, duke shënuar 14 shifra më tepër se një vit më parë. Sipas sociologëve një fenomen i tillë mbetet pre e papunësisë, vetmisë por edhe përdorimit të drogës dhe alkoolit. Vetëm brenda 1 javë janë kryer 4 akte vetëflijimi, konkretisht në Tiranë, Vlorë dhe Korçë.

Sipas të dhënave nga INSTAT, vitin e kaluar 213 persona i kanë dhënë fund jetës, që rezultojnë të jenë 14 vetërasje më tepër se në 2017-tën. Sipas socilogëve ndër shkaktarët kryesorë të vetëvrasjeve mbeten varfëria dhe papunësia por shqetësimi i kohëve moderne siç e cilësojnë është edhe vetmia.

Sociologu Tushi thotë se duhet treguar më tepër kujdes tek adoleshentët, pasi ata janë më të rrezikuar për të kryer vetëvrasje për shkak të drogës dhe alkoolit. ”Një pjesë e njerëzve humbasin vetëdijen, koshiencën e tyre nga përdorimi i zgjeruar i lëndëve psikotrope siç është droga dhe alkooli që po përdoren gjerësisht nga të rinjtë, nga fëmijët dhe nga të rriturit. Kemi nevojë që në këtë botë të vështirë me halle dhe konkurenciale, të gjejmë motivet e shëndetshme të fëmijëve dhe njerëzve tanë”.