Shkarkohen nga detyra 15 punonjës të Zyrës së Regjistrimit të Pasurive të Paluajtshme në Tiranë dhe paralajmëron për përjashtim nga puna 25 punonjës të tjerë. Nisur nga ankesat e qytetarëve, Zyra Qendrore e Regjistrimit të Pasurive të Paluajtshme, nisi një kontroll pranë ZVRPP Tiranë në lidhje me pretendimet për zvarritje dhe mosrespektim të afateve ligjore në kthimin e përgjigjeve të aplikimeve nga qytetarët. “Nga ky kontroll i ushtruar rezultoi se për periudhën 03.01.2013-13.10.2013 janë paraqitur një numër i madh aplikimesh në ZVRPP Tiranë, një pjesë e konsiderueshme e të cilave për shkak të zvarritjeve në trajtimin e tyre nuk kanë përfunduar brenda afateve të caktuara në urdhrin nr 1191 datë 05.11.2012 të Kryeregjistruesit, i cili përcakton afatet e trajtimit dhe përpunimit të kërkesave sipas natyrës së tyre, nga zyrat e regjistrimit të pasurive të paluajtshme.”- thuhet në njoftimin e ZQRPP-së.
Gjithashtu mësohet se gjatë kontrollit janë konstatuar raste, kur aplikimet e paraqitura nga qytetarët edhe pse kishin kohë që ishin kryer pranë kësaj zyre, nga specialistët e saj nuk ishin marrë në shqyrtim dhe si pasojë kishin mbetur për një kohë të gjatë pa u trajtuar, duke tejkaluar çdo lloj afati. Sipas ZQRPP-së, gjatë këtij kontrolli u konstatuan shkelje të rënda në zbatim të ligjshmërisë në procesin e regjistrimit të titujve të pronësisë. Këto shkelje u konstatuan jo vetëm në regjistrimin e titullit të pronësisë, por edhe në aspektin hartografik, i cili ka të bëjë me pasqyrim e pasurisë në hartat treguese.
Kryeregjistruesi i Zyrës Qendrore të Regjistrimit të Pasurive të Paluajtshme, Ilirjan Muho thekson vendosmërinë garantimin e një shërbimi të shpejtë dhe cilësor për qytetarët.
“Nisur nga konstatimet e verifikuara në këtë kontroll, Zyra Qendrore do të vazhdojë edhe me kontrolle të tjera duke e thelluar procesin e kontrollit të Regjistrimit të Pasurive të Paluajtshme. Nëpërmjet masave të dhëna synohet të përmirësohet në mënyrë të dukshme cilësia e shërbimit që u ofrohet qytetarëve nga Zyrat e Regjistrimit të Pasurive të Paluajtshme, rritjen e shpejtësisë se shërbimeve, duke respektuar me rigorozitet afatet e përcaktuara në ligj dhe aktet nënligjore që rregullojnë veprimtarinë e kësaj zyre, duke synuar eliminimin përfundimtar të zvarritjeve dhe sorollatjeve të qytetarëve nëpër sportele”, – deklaroi Muho.