Lavdërim Miminllari
Është për të ardhur keq kur një fshat me një popullsi prej afro 1400 banorësh ka me vite që kërkon certifikatat e pronësisë, të marrë me ligjin 7501. Fshati nuk ka certifikata as për shtëpitë e trashëguara, ato të babait apo të gjyshit para viteve 1990, për arsye se në trazirat e 1997-s u dogjën dhe ne jemi pa certifikata pronësie. Këtë e vuan ky komunitet që nuk mund të marrë as kredi, nuk mund të bëjë, as biznes, as nuk mund të shesë e të blejë gjë.
Ku nuk kemi dërguar letra e ankesa! Por kjo gjë po bën 20 vjet që ka rënë në vesh të shurdhër. I jemi drejtuar zyrës së hipotekave Tiranë. Edhe Avokatit të popullit, i cili ka ndërhyrë, po zgjidhje nuk kemi marrë dhe sot e kësaj dite. I jemi drejtuar dhe ish-presidentit e, akoma asnjë zgjidhje. Shpesh përdoret shprehja: Ne do ju ndihmojmë. Por ende asnjë ndihmë në këtë drejtim. Më lind pyetja: Ku janë deputetët që iu kanë marrë votat? Vallë nuk e dinë këtë shqetësim?! Them se po. Një ligj i ri, i dalë para disa ditëve, nuk është për ne. Por ne duhet të na bëhet digjitalizimi, i cili ka një kosto 50-100 milionë lekë të vjetra ku, nga përgjigjet që na janë kthyer, thuhet se hallin t’ua zgjidhë hipoteka e Pogradecit. Unë i kujtoj zonjës ministre që disa herë ka ardhur në Pogradec, se duhet fond parash e këtë gjë e kini në dore ju. Ne jemi qytetarë që shtetit tonë, i paguajmë taksa atij. Ju kujtojmë që ky fshat nuk ka as ujë, po nuk po ua kërkojmë, sepse shpesh herë na është thënë: “Do jua zgjidhim…” Ne presim e presim, qeveritë ndërrohen dhe premtojnë, por sot problemi ynë është po ai, i certifikatave të pronësisë, i cili është ende i pa zgjidhur. Ju kujtojmë se, ne kërkojmë digjitalizimin, kur për fat të mirë kemi dhe regjistrin dhe personin që na ka ndarë tokat P. M., sipas ligjit 7501. Për këtë ne u gëzuam kur Këshilli bashkiak mori vendim, se do na i bënte, por ç’e do, se dhe ajo, bashkia, s’ka fonde. Ju kujtojmë se kjo është një neglizhencë që e vuan komuniteti i banorëve të fshatit Blace. Si e thamë më lart: Shoqata “Mali i Thatë” i është drejtuar Ministres së drejtësisë dhe përgjigjja që na u dha ishte një shkresë ku thuhej, se do t’na e zgjidhte hipoteka e Pogradecit. Vetë Ministrja për fat të mirë ka ardhur vetë disa herë në Pogradec, por problemi vazhdon të mbetet i pa zgjidhur. Ne kërkojmë fonde z. Ministre, gjë për të cilën jeni ju që duhet t’na i jepni e jo hipoteka e Pogradecit. Ju kujtojmë se ky shqetësim është ngritur edhe te prefekti i Korçës, i cili ka thënë, se do t’ju ndihmojmë, por deri tani s’kemi zgjidhje. Këta banorë jetojnë e punojnë me pritjen tejet të zgjatur, se vendimi 7501 që na ka dhënë tokat, do na bëjë e pronarë. Arsyeja tjetër është se pritja na ka sjellë e probleme, për arsye se një pjesë e të moshuarve janë larguar nga kjo jetë dhe na duhet të bëjmë dhe gjyqe brenda familjes.
Me shpresën tonë se ky problem do gjejë një zgjidhje nga organet përkatëse dhe banorët e këtij fshati do pajisen me certifikata pronësie.
Kryetari i shoqatës “Mali i Thatë” Pogradec
