Dita e Verës është një festë pagane e trashëguar ndër breza bashkë me disa rituale specifike, që vijojnë të respektohen edhe pse të përshtatura me kohët që jetojmë. Dikur dedikimet i kushtoheshin perëndisë Diana, në faltoren e Zanës së Çermenikës, një zonë kjo në Librazhd, ku ato praktikoheshin për një jetë më të mirë, të mbushur me gëzim, dashuri dhe begati. Festimet që kulmonin më datë 14 mars, paraprihen nga rituali i zjarreve të mesnatës, i cili simbolizon largimin e dimrit dhe paganët dikur besonin se i jepnin forcë diellit. Qindra qytetarët iu bashkuan këtij rituali në qytetin e Korçës. Pasi kapërcyen zjarrin që besohet se largon të keqen, qytetarët u larguan me urime për njëri tjetrin. Por në Kukës, tradita po devijohet, pasi në vend të druve e shkurreve, të rinjtë i kanë zëvendësuar me goma, të cilat shkaktojnë ndotje dhe prishin kështu pastërtinë që stina e luleve pritet të sjellë. Të tjera rite nisin në orët e para të mëngjesit kur një anëtar i familjes mbush ujë të freskët dhe fut në shtëpi bar të njomë. Veç kësaj, ditën e verës, lidhet në dorë një “verore” që është si byzylyk i formuar prej një fijeje të kuqe dhe një fijeje të bardhë. Familjet presin vizita dhe më pas organizojnë piknik në natyrë.
