Janë disa drejtues lokal shërbimesh publike në rrethe të quajtur “të vegjël”, të cilët edhe pse kanë reformuar për mirë përmbajtjen, cilësinë, etikën e punonjësve dhe korrektesën e shërbimeve në funksion të plotë e aktiv të qytetarëve duke i çuar këto shërbime në zonë, në fshat, në biznese, në fushë, në lagje e deri tek “dera e shtëpisë” së qytetarëve, vazhdojnë të punojnë krejt pa bujë, pa “daulle kapardisjeje”, duke qëndruar në atë modestinë tipike të njeriut “babaxhan” e të përkushtuar që i dëgjohet vetëm “zëri i punës” e jo “ulërimat” e mburrjes kafeneve, zyrave të shtetit e të politikës! Pikërisht, këto modele “drejtuesish popullor” nuk duhet të lihen “në harresë” për shoqërinë! Ata vlejnë e madje vlejnë shumë të publikohen dhe vlerësohen jo vetëm si emër, si kontribut e si shifra bilanci arritjesh të larta që i kanë sjell institucionit, por së pari si “model drejtuesi” për të cilët ka nevojë shoqëria, puna, institucioni, shërbimi ndaj komuniteti e pse jo edhe qeverisja, sidomos sot kur të tillë drejtues janë me “piktore”!
Qytetarët: “Drejtori i ri “ka futur në brazdë” punët dhe punonjësit e Postës
Një “model drejtuesi” të tillë e “zbuluam” rastësisht katër ditë më parë në Tepelenë. Quhet Florian Dajka. Qysh prej muajit tetor 2013, ose më saktë prej 30 muajsh “ky djalë i zonës” drejton punët e Degës “Posta-Tepelenë”. Emri këtij drejtuesi u përmend gjatë një bisede me disa të njohur, banorë të Tepelenës e Memaliajt. Ata na thanë: “Shkruani diçka për ndryshimin e madh që ka bërë Florian Dajka në Shërbimin Postar në gjithë rrethin e Tepelenës, duke shpëtuar njerëzit nga katrahura, tallja, sjella brutale e disa punonjësve, vonesat, abuzimet për shërbimet dhe marifetet për ryshfete edhe për marrjen e pensionit, ndaj vlen të propagandohet si model pune”! Nisur prej këtij vlerësimi bindës të qytetarëve të Tepelenës e Memaliajt, vendosëm të shkruajmë për ato ndryshime e arritje konkrete që ka bërë e ka siguruar puna e drejtuesit Florian Dajka në profilin institucional dhe punët e “Posta-Tepelena”, që për hir të së vërtetës, deri 30 muaj më parë, prej disa ish punonjësve abuzivë e prepotentë ishin katandisur në “atë farë derexheje”, sa sporteli tek disa nga zyrat postare konsiderohej “frëngji stresi e abuzimi”!
Portret i pa autorizuar për drejtorin Florian Dajka, por i konfirmuar nga drejtuesit qendror
Me detyrimin që na “ngarkuan” qytetarët e Tepelenës, vendosëm të shkruajmë diçka për punët e këtij drejtuesi, për modelin që ka krijuar e instaluar në krye të punëve të degës “Posta-Tepelenë”. Ditën që gjendeshim në Tepelenë dhe kontaktuam me të me telefon, zoti Dajka gjendej në zonën e Buzit, në një takim me banorët për të “verifikuar” korrektesën e shërbimit të Zyrës Postare. të zonës! Koha e pakët në dispozicion, na detyroi të pyesim në Drejtorinë e Përgjithshme, prej të cilës u konfirmua ajo që na thanë banorët e Tepelenës, Memaliajt e Krahësit. Ky drejtues, ka një tregues shumë domethënës në punën e tij: Ka ndryshuar totalisht punët në shërbimin postar të kësaj dege jo me prepotencë e kapadaillëk, por me kërkesë llogarie, me bashkëveprim në ekip, duke instaluar atë cilësi, korrektësi, etikë, llojshmëri e shpejtësi shërbimi që duan qytetarët, të cilët tashmë kanë nisur t’i drejtohen postës për shumë shërbime, që më parë nuk i kryenin në postë për shkak të abuzimeve, vonesave, sorollatjeve, presioneve të punonjësve të veçantë e tipik për ryshfete, mungesës së korrektesës, orarit që ishte vendosur e zbatohej si “orar administrate”! Drejtuesit e Posta Shqiptare, konfirmojnë këtë fakt: Florian Dajka nuk e ka nisur punën nga luksi i zyrës së tij, por nga krijimi i kushteve për punë normale në zyrat postare në Memaliaj, Tepelenë e sidomos në zyrtar postare zonale! Emergjencë e veprimtarisë së këtij drejtuesi, ka qenë reformimi praktikave të punës së stafit drejtues, rregulli në shërbim dhe etika e punonjësve në qendër e në zyrat postare.
Me 21 punonjës, përballohen 100 loje shërbimi në 9 zyra postare me veprim aktiv e korrekt
Dega e Postës në Tepelenë, aktualisht ka 21 punonjës në total. Me këtë numër të vogël punonjësish, të mbetur pas reformimit të strukturës organike, nëpërmjet riorganizimit të shërbimeve e sektorëve dhe shërbimeve konkrete në zona sipas volumit të punëve, kjo degë postare kryen e përballon me efiçencë 100 loje shërbimesh. Ky shërbim postar kryhet nga 9 zyra postare që funksionojnë në Tepelenë, Memaliaj, Krahës, Buz, Progonat, Kalivaç, Qesarat, Sinanaj e Izvor! Shërbimet kryesore që përballon Dega e Postës e Rrethit të Tepelenë me arteriet e saj në zona, janë shërbimet e OSHEE, pensionet, shërbimi i pensioneve në familje, letrat, pagesa të ndryshme për shërbime publike e private, bankare, transferuat vlerash monetare, dërgim e pritje koli postare etj. Në këto zyra ka edhe shërbime “online”, ka shërbime edhe me orar të zgjatur e në ditë festash. Troç, shërbimit postar në rrethin e Tepelenës i është rikthyer komuniteti për të plotësuar këkresat e përditëshme, të cilat kjo degë poste ua kryen me shpejtësi, korrektësi, ndershmëri e cilësi!
