Porti i Igumenicës, Korfuzit dhe Sarandës, bashkëpunim për ndotjen mjedisore detare

249

Fundjava që kaloi shënoi edhe një takim mes autoriteteve portuale të Igumenicës, Korfuzit dhe Sarandës në qytetin grek të Igumenicës. Takimi i përfaqësuesve të tri porteve të rajonit jonian në qytetin e Igumenicës, u zhvillua në kuadër të zhvillimit të projektit të Bashkimit Evropian “KROS-BORDER”, i cili synon kryesisht në forcimin e masave të ruajtjes mjedisore në zonën bregdetare Sarandë-Korfuz-Igumenicë. Ky projekt ka një vit që ka filluar të zbatohet në rajonin jonian që përfshin këto tri porte detare dhe në këtë takim u raportua se çfarë ishte arritur deri më sot, pasi përfundimi i projektit ka afatin kohorë deri në fund të muajit shkurt 2014. Këto detaje nga ky takim i Igumenicës i bën të njohura për “Telegraf”, n/drejtori i Portit Detar të Sarandës, z.Muharem Merko, i cili ka kryesuar përfaqësinë e këtij porti në takim. Merko thotë se, në raportimin e tij para autoriteteve të BE-së në këtë takim, ka vënë në dukje se projektet e caktuara për këtë periudhë përsa i përket portit detar të Sarandës, janë përfunduar prokurimet publike dhe është bërë zbatimi në masën 50% të tyre, kjo e ardhur për arsye të mungesës së fondeve, fonde të cilat priten të akordohen dhe të përfundojë zbatimi i plotë i tyre. Gjithashtu takimi rajonal jonian i Igumenicës vendosi që në të ardhmen, deri në fund të muajit shkurt 2014, kohë kur përfundon edhe afati i zbatimit të projektit të Bashkimit Europian “KROS-BORDER” për forcimin e masave mjedisore në rajonin jonian Korfuz-Igumnicë-Sarandë, të zhvillohet në qytetin e Sarandës një seminar për kualifikimin e punonjësve të këtyre porteve dhe një konference e gjerë me pjesëmarrjen e autoriteteve portuale dhe institucioneve shtetërore dhe njësive vendore që kanë lidhje direkte me masat e dhe detyrat e ruajtjes së mjedisit në këtë rajon, si dhe vendosjen e aparaturave matëse të ndotjes detare të këtij rajoni detar.