Pasagjeri aksidentohet rëndë në tragetin Durrës-Bari, kapiteni dhe porti fshehin ngjarjen

250

Tragetet e pasagjerëve, 40 dhe 50 vjeçare. Të tejmbushura dhe pa mjekë e medikamente

 

Zbulohet Skandali – Aksidentohet rëndë në traget, kapiteni dhe porti fshehin ngjarjen

 

Një skandal i radhës është bërë publik në tragetet e linjës Durrës-Bari, ku aksidenti i një pasagjereje është fshehur nga kapiteni i anijes, ndërkohë që drejtuesit e Portit Durrës nuk kanë pasur asnjë informacion. Renata Dura denoncoi në emisionin investigativ “Fiks Fare”, se u aksidentua në brendësi të një trageti të linjës Durrës-Bari dhe asnjë institucion nuk ka bërë hetime. Ajo thotë se po lëvizte me shkallët elektrike të anijes, kur befas dëgjoi një zhurmë dhe ra nga këto shkallë, duke i shkaktuar dëmtime të rënda trupore. Ka shkuar në spital për mjekime, ndërsa policia vetëm sa e ka parë.  Ngjarja vjen disa muaj pas investigimeve për kushtet e këtyre trageteve apo mungesës së personelit mjekësor. Vëzhgimi faktoi se tragetet mbushen tej kapaciteteve. Si pasojë e kushteve, një qytetar u ndje keq në mes të detit, madje dhe humbi jetën. Askush nuk i erdhi në ndihmë dhe në traget nuk kishte as mjek, as infermier, madje as medikamente mjekësore. E njëjta problematikë duket se është edhe pas 1 viti. Një qytetare që udhëtonte nga Durrësi për në Bari është aksidentuar në tragetin e linjës “Ventouries Ferries”, në datën 9 maj 2019, në orët e darkës.

“Në datën 9 maj po udhëtoja nga Durrësi për në Bari me tragetin e linjës ‘Ventouries Ferries’, bashkë me vajzën time me probleme mendore. Teksa po hipja shkallët elektrike në brendësi të tragetit, rrëshqas dhe dëmtohem tek këto shkallë. Godas kokën dhe rrëzohem poshtë te shkallët. Ndjej një goditje para se të rrëzohesha. Dua të theksoj se, edhe pasi u rrëzova, shkallët vazhdonin të lëviznin dhe unë isha në hyrje të këtyre shkallëve. Nga lëvizja e shkallëve unë goditesha përsëri dhe situata vazhdoi nja 6 a 7 minuta të tjera. Askush nuk më erdhi në ndihmë, madje as shkallët nuk u fikën” thotë Renata Dura. Sipas saj, nga këto goditje pësoi dëmtime në kokë, krahë, këmbë si dhe ënjtje të gjymtyrëve. “Zbrita sërish nga trageti dhe me ambulancë më çuan në Spitalin e Durrësit. Në spital më bënë disa qetësues dhe serum. Gjatë gjithë kësaj kohe kisha hallin e vajzës sime me probleme mendore. I kërkova stafit të spitalit të largohesha sërish në traget për të ikur në Itali. Në spital ka ardhur edhe një oficer policie më ka pyetur dhe i kam thënë se nuk më ka ardhur ndihma e shpejtë në traget. Në spital kam nënshkruar vetëm një deklaratë te infermieri që duhet të largohem për në spital” thotë qytetarja, e cila jeton në Itali.

Doktori i Portit: Në tragete nuk ka mjekë

Pas ankesës, grupi i “Fiks Fare” shkoi në Portin e Durrësit, ku takoi drejtorin Agron Tare. Drejtori thotë se nuk ishte në dijeni të kësaj ngjarjeje. Z.Tare bën disa telefonata me punonjës të stafit dhe mëson se ngjarja ka ndodhur, por ai nuk është vënë në dijeni. Gjithsesi, për rastin në fjalë, ai thotë se nëse personi i aksidentuar ka dëmtime, duhet të bëjë kallëzim penal në polici apo organe të tjera. Drejtori i Portit pohon se gjithçka është e verifikueshme, pasi mund të filmohen edhe ambientet e brendshme të tragetit, ku ka ndodhur ngjarja. Pas këtij miratimi, “Fiksi” tenton që të xhirojë brenda në traget. Gjatë kohës që grupi ishte në terminal, punonjësi i sigurisë së portit komunikon me punonjësit e tragetit. Pas disa minutash pritjeje, një punonjës i tragetit thotë se nuk lejohet të filmohet brenda ambienteve të tragetit, pasi “është privat”.  Në lidhje me ngjarjen, “Fiks Fare” shkoi edhe në Sektorin e Mbrojtjes së Shëndetit në Portin e Durrësit: Doktori i Portit Durrës thotë se është në dijeni të ngjarjes së datës 9 maj, por nuk është marrë ai personalisht, por mjeku i terminalit. Gjithashtu, thotë se në traget nuk kishte mjek, pasi duhet të ketë 1000 persona në bord dhe të bëjë 24 orë lundrim për të pasur mjek. Ndërkohë mësohet nga Autoriteti Portual i Durrësit se në traget ka pasur kamera, por ato nuk regjistrojnë, pasi përdoren vetëm për vëzhgim.

Tragetet e pasagjerëve, 40 dhe 50 vjeçare!

“Fiks Fare” iu drejtua Ministrisë së Infrastrukturës dhe Energjisë, duke i kërkuar se çfarë mjetesh lundruese kanë firmat që transportojnë pasagjerë nga Shqipëria drejt vendeve të tjera. Gjithashtu, u kërkua se kush i certifikon dhe kontrollon tragetet e pasagjerëve.  Ministria u përgjigj se trageti Rigel III, ku ndodhi aksidenti i datës 9 maj, është prodhuar në vitin 1979. Pra, 40 vjeçar! Ndërkohë, e njëjta kompani që operon në linjën Durrës-Bari-Durrës ka edhe dy tragete të tjerë: Rigel 1, i prodhuar në vitin 1980 dhe Rigel II i prodhuar në vitin 1973. Të tre, kanë flamur të Qipros.  Sipas ministrisë, shumica e mjeteve lundruese që transportojnë pasagjerë janë të viteve 70′ dhe 80, pra 40 dhe 50 vjeçar. Ndërkohë, shumë pak mjete lundruese janë të pas viteve ’90. Kompania tjetër që operon në linjën Durrës-Bari ka tre tragete: AF Francesca i vitit 1979, AF Michela i vitit 2000 dhe AF Marina i vitit 1992. Kompania e tretë që operon në linjën Durrës-Bari ka 1 traget: AN Francesca i vitit 1979.  Ndërkohë, kompania e linjës Sarandë-Korfuz-Sarandë, ka dy tragete: Saranda Express i vitit 1983 dhe Ilida Dolphin i vitit 1981.  Në këtë linjë, operon një firmë tjetër me tre tragete: Santa i prodhuar në vitin 198, Kristi i vitit 1979, Marina i vitit 1970 dhe Santa III i vitit 1981.  Kompania e tretë që operon Sarandë – Korfuz, ka 2 tragete: Georgia, i vitit 1993 dhe Rena SII i vitit 1981. Linja Vlorë – Brindisi ka dy tragete: Red Star 1, me flamur të Panamasë, i vitit 1965 dhe “ST Damian” i vitit 1972.

Sipas ministrisë, Kontrolli Shtetëror Portual është Autoriteti, i cili ushtron kontrollon dhe inspekton të gjitha anijet. Sipas saj, vërtetimi mbi gjendjen teknike të mjeteve lëshohet nga titullari i Drejtorisë së Përgjithshme Detare.