Paris, Leskaj debat me deputeten serbe: Kosova të anëtarësohet në KiE

510
Nënkryetarja e Kuvendit Valentina Leskaj, mori pjesë në debatin e Komitetit Politik të Këshillit të Evropës për çështjen e Kosovës, në Paris, ku u paraqit raporti për Kosovën nga Raporteri i saj, Agustin Conde. Leskaj, kërkoi që Kosova të bëhet anëtare e KiE-së me të drejta të plota dhe replikoi me një deputete serbe që kundërshtoi këtë gjë. “Kjo do të ishte një nxitje dhe inkurajim për Kosovën dhe popullin e saj në rrugën e integrimit evropian, një kontribut i rëndësishëm për stabilitetin e mbarë rajonit dhe perspektivën evropiane të të gjithë vendeve të rajonit. Kosova ka arritur një progres në rrugën e saj drejt konsolidimit të demokracisë, të të drejtave të njeriut, shtetit të së drejtës dhe qëndrueshmërisë së këtyre standardeve. Anëtarësimet e deritanishme të Kosovës në institucionet financiare botërore, por sidomos nënshkrimi i MSA-së dhe ratifikimi i menjëhershëm i saj nga Parlamenti i Kosovës, dëshmojnë për një vullnet të palëkundur politik drejt përmbushjes së standardeve të kërkuara”, vlerësoi Leskaj.
Në përgjigje, ndaj ndërhyrjes së deputetes serbe mbi raportin, Leskaj përmendi faktin se në të gjithë procesin e rëndësishëm dhe të vështirë të normalizimit të marrëdhënieve me Serbinë, Kosova ka shfaqur vullnet të qartë politik duke nënshkruar disa marrëveshje dhe duke i qëndruar opsionit të dialogut të hapur për të gjitha çështjet. Ajo nënvizoi se ky qëndrim përmirëson jo vetëm klimën e raporteve dypalëshe Kosovë-Serbi, por edhe ndikon në qëndrueshmërinë e stabilitetit në rajon.  Leskaj shtoi se, gjuha e përdorur nga deputetja serbe nuk përkon me frymën e KiE dhe nuk kontribuon për paqen, stabilitetin dhe dialogun në zgjidhjen e mosmarrëveshjeve dhe konflikteve.  “Këtu duhet të ofrohen modele pozitive: Një grup i madh studentësh serbë qëndruan gjatë në familjet shqiptare. Si studentët, ashtu edhe futbollistët e përfaqësueses serbe, deklaruan në mediat vendase dhe të huaja se u ndjenë shumë mirë në Shqipëri”, theksoi Nënkryetarja e Kuvendit shqiptar, duke shtuar se kjo bën që në rajonin tonë të fryjë era e bashkëpunimit dhe komunikimit mes vendeve dhe popujve. Në mbyllje të fjalës së saj, Leskaj nënvizoi sërish se anëtarësimi i Kosovës në KiE do të ndihmonte Kosovën në mënyrë të veçantë në vazhdimësinë e reformave dhe atë të forcimit te ligji.
Sigal