Tre persona janë arrestuar nga policia e Durrësit dhe tre të tjerë po ndiqen penalisht në gjendje të lirë pas një operacioni të koduar “Çiklisti”.
Burime zyrtare thanë se operacioni u ndërmor pas një hetimi tremujor ndaj grupit që merrej me shpërndarjen e lëndëve narkotike si kokainë dhe kanabis.
Ata kishin gjetur një metodë për të mos rënë në sy për shpërndarjen e lëndëve narkotike përdorur kryesisht biçikleta, ku edhe fshihnin drogën.
Sipas policisë, të arrestuarit, dozat e lëndëve narkotike, kokainën dhe kanabisin e fshihnin në një pjesë të biçikletës (pjesën e pasme) dhe më pas i shpërndanin.
“Mjeti që përdornin ishte biçikleta ose motor me qëllim që të mos identifikoheshin që po kryenin veprimtari të jashtëligjshme”, thuhet gjithashtu.
Në pranga përfunduan Florian Likmeta, 41 vjeç, Detara Rama, 24 vjeç dhe Erti Bllaca, 31 vjeç, banues në Durrës. Policia sqaroi se po ndje penalisht në gjendje të lirë shtetasit S.Zh. 23 vjeç, E.M. 22 vjeç, banues në Durrës, si dhe G.R. 20 vjeç, banues në Tiranë.
“Më datë 17.12.2016, në lagjen Nr.13, Durrës, gjatë kontrollit fizik të ushtruar shtetasve të mësipërm, përfshirë edhe tre muajt të hetimit, u janë sekuestruar në cilësinë e provave materiale, lëndë narkotike, të ndara në doza për t’u shitur”, sqaron policia.
Më konkretisht janë sekuestruar:
-rreth 100 gr lënde narkotike e dyshuar e llojit Kokainë;
-rreth 500 gr lënde narkotike e dyshuar e llojit Cannabis Sattiva;
-një thikë;
-një kaçavidë, brenda së cilës vendosnin lëndën narkotike;
-një biçikletë;
-lekë dhe aparate telefoni celular.
Policia sqaron se shtetasi F.Likmeta ka qenë i arrestuar në vitin 2014, po për të njëjtën vepër penale (shpërndarës kokaine) dhe gjatë kësaj periudhe ka qenë në lirim me kusht.
Materialet kaluan Prokurorisë së Rrethit Gjyqësor Durrës për veprime të mëtejshme për veprat penale “Prodhimi dhe shitja e narkotikëve”dhe”Prodhimi, mbajtja, blerja apo shitja pa leje e armëve të ftohta”
