Faza e tretë e regjistrimeve për në Universitet ka shtuar fluksin pranë Sekretarive mësimore. Fituesit kanë vetëm 48 orë kohë të dorëzojnë dokumentacionin përkatës.

Në ditën e parë pranë Sekretarive u paraqitën mbi 9 mijë maturantë. Në fakultetin e Historisë dhe Filologjisë programet e studimit si Gjuhë Letërsia, Gjeografia dhe Historia mbeten më të preferuarat.

“Degët tradicionale historia, egjeografia, gjuhë letërsia kanë pasur ecurinë më të mirë. Në këto degë zgjidhin ata që e kanë të sigurtë që do të fitojnë”, shprehet Sabri Laçi, Dekan i Fakultetit të Historisë dhe Filologjisë.

Me ritme të ngadalta ka ecur regjistrimi në degët si Gazetari dhe Arkeologji.

“Trendi ka qenë pak më i ngadalshëm, por kjo nuk na bën pesimist”, shton Sabri Laçi, Dekan i Fakultetit të Historisë dhe Filologjisë.

Nga 1280 kuota në Fakultetin e Ekonomisë janë bërë 410 regjistrime. Më e preferuara ka qenë dega e Financës.

“Kjo si procedurë ka një panik të brendshëm dhe ky është një panik për universitet publike sepse në universitetet jopublike nuk e kanë panikun, ata që kanë aplikuar nuk ikin nga lista. Të jenë të sigurt që 850 pikë e sipër në Biznes u vjen radha”, shpjegon Dhori Kule, Dekan i Fakultetit të Ekonomisë.

Dekanët e dy prej fakulteteve të Universitetit të Tiranës, Sabri Laçi dhe Dhori Kule apelojnë për durim, pasi mundësitë për tu ulur në auditore janë të larta.

Madje ata theksojnë se mund të shtojnë kuotat, nëse kërkesat janë të mëdha.

“Nëse fluksi i kërkesave për tu regjistruar në degët tona të jetë i madh ne do të insitojmë tek institucionet eprore, si ministria e Arsimit që të kemi kuota për ti pranuar të gjitha ata që duan të studiojnë programet tona”, sqaron Sabri Laçi, Dekan i Fakultetit të Historisë dhe Filologjisë.

“Të mos ikin diku tjetër ku ata nuk duan, por të parë kanë një nga degët tona u them mos u largoni, sepse cilësinë e mirë edhe nëse do kemi më shumë se 30 – 40 më shumë sesa janë kuotat, ne kemi të gjitha hapësirat të miratojmë kuota shtesë”, sgprehet Sabri Laçi, Dekan i Fakultetit të Historisë dhe Filologjisë.

Faza e tretë përfundon këtë të martë, pas kësaj do të ketë sërish lëvizje të vijës së kuqe.

Raundi i parë i regjistrimeve do të përmbyllet në datën 12 shtator.