2 vjet burg dhe përjashtim nga radhët e ushtrisë i ka kushtuar Gersjan Dumit ngacmimi seksual dhe përndjekja e koleges së tij në ushtri.
Gjykata e Krimeve të Rënda ka dhënë vendimin ndaj ushtarakut duke e dënuar atë pas 4 seancave me 2 vite burg me akuzën e shtrëngimit me anë të kanosjes e dhunës për dhënie pasurie.
Ka qenë kreu i Gjykatës së Krimeve të Rënda Sandër Simoni që ka pranuar kërkesën e prokurorisë për dënimin e ushtarakut që prej disa muaj deri në momentin e arrestimit shantazhonte kolegen e tij në ushtri duke i kërkuar marrëdhënie seksuale jashtë dëshirës.
Përveç dënimit me burg Dumi është përjashtuar edhe nga radhët e ushtrisë. Më 13 nëntor 2016 Dumi ra në prangat e policisë teksa më parë ishte kallëzuar në polici dhe ndaj tij kishin nisur hetimet.
